Бороотой мөрөөдөл

Ангаж цангасан газар дэлхийг услахаар бороо айлчилж ирсэнийг өглөө хараад сэтгэл сэргэж, баяр төрөөд сайхан гэж...

Миний төрсөн  газрын баримжаагаар бол энэ намрын сүүлчийн бороо байх ёстой. Харин миний амьдралаа зохиосон газрын энэ жилийн анхны бороо юм уу даа?

Бороо хуучин бүхнийг угааж шинэ бүхнийг тэтгэх эхлэл.

Баярын улирал, бороо ороод ирэхтэй зэрэг шинэ оны тухай мөрөөдөл сэргэж, амьдрал бас услагдаж ургах бэлтгэлээ хийх мэт сэтгэгдэл төрдөг.

Өөрийн эрхгүй түрүү жилийн өдийд би, бид, амьдрал, ажил ямар байлаа гэж эргэн дурсдаг. Амьдралын давалгаа жам ёсоороо дээш, доошоо долгилсон байх ч юутай хүмүүн гэдэг утгаараа нэг жилийн дараа нэг шат дээшилсэн байх нь сайхан.

Дээшилсэн гэдэгт мэдээж нэмэгдсэн гутал, хувцас, шинэчлэгдсэн тавилга орохгүй л дээ.

Нэг зүйлийг ойлгон, ухаарч, ганц хүнд тусалж, ажлаас юм сурч авсан, хэрэггүй харилцаанаас ангижарч, шинэ найзтай болсон, хол ойр аялж, соргог юм үзэж, нүд тайлсан гээд ахиц гарсан байх. Бодоод үзээрэй. 

Мэдээж ямар ч алдаагүй, огт бүдрэхгүй амьдарна гэж юу байхав. Алдаагаа давтсан ч үргэлжүүлээд хичээгээд байвал болох нь тэр. 

Харин шинэ ондоо заавал хийх болон, байх жагсаалтаа эртнээс гаргахыг зөвлөж байна. 

Нөгөө 20 давхарын хэмжээнд мөрөөдөж 19 давхартаа хүрнэ гэдгээр мөрөөдлөө дахин нэг эргэцүүлж, үргэлжлүүлэн мөрөөдөөд байгаарай. 

Борооноор мөрөөдөх ч бүр сайхан шүү! 

Холбоотой бичлэгүүд 

ЭНД ДАРААРАЙ 

ЭНД ДАРААРАЙ

Намар төсөл

Сүүлийн хэдэн жил хүмүүст ажил олж өгөх, ярилцлаганд бэлтгэх маягийн зүйлсийг бага багаар хобби болгон хийсээр ирсэнийг зарим хүн мэдэх байх. Хобби урчаас нэг долларын ч орлого олоогүй.

Харин ажил мэргэжлээ сольсон нь тэрхүү хоббигоо мөнгө олдог болгох зорилготой холбоотой байлаа. Би карерь гэж хэлэхээс аль болох зайлсхийдэг. Учир нь би тэр хэмжээний албан тушаалтай ч биш, тийм хэмжээний мөнгө ч олдоггүй. Карерь хийх миний мөрөөдөл ч биш. Амьдрал бололцоо олговол дуртай ажлаа хийж, хамт олонтой байх сайхан. Мэдээж амьдралын байдлаас болоод гэртээ суудаг ээж болвол надад бас л сайхан.

Төрсөн өдрийн сараа тохиолдуулан хүн болж төрсөний хувьд ямар нэг зүйл хийхээр "Намар" төслийг төлөвлөсөн юм. Хэдийгээр нэлээн хэдэн том жижиг зүйл миний бяцхан төсөлд багтсан ч бүгд санааны зоргоор бүтсэнгүй. Юутай ч их бага хэмжээгээр цөөхөн хэдэн хүнийг баярлуулсан гэж ойлгож байгаа.

Гэхдээ нэг хүний амьдралыг бол өөрчилөхөд тусалж чадсан шүү!

Хэн нэгний амьдралыг орвонгоор нь өөрчлөх чадалтай байхын сайхныг сэтгэлдээ төсөөлж явсанаас чухам ямархуу мэдрэмж төрдөгийг энэ мөчид л мэдлээ.


Өчигдөр утсанд маань хэд хэдэн мэссэж дараалан ирж байна. Ид ажлын дундуур байсан тул нүднийхээ үзүүрээр гүйлгэн хартал хүүхдийн сургууль, нөхөр, эмч нарын нэгнээс биш байсан тул яаралтай биш байна гэж ойлгон ажилдаа улайрсаар өдөр өнгөрчээ.

Ажлаа тараад машинруугаа алхах зуураа утсаа шалгаж амжив.

Манай хүүхдийн найз охины ээжээс баахан баярласан, талархсан мэссэж, есөн шидийн партины анимешион (монголоор юу гэхийг ёстой бүү мэд)  завтай болохоороо залгаарай гэснээр төгсөж.

"Намар" төслийнхөө хүрээнд хоббиныхоо дагуу өөр шигээ гадаад орноос цагаачилж ирсэн жирийн нэг эмэгтэйд туслах зорилгоор түүнийг шинэ ажилд ороход нь coach ( зөвлөгөө өгч мөн үү?) хийж, ажлын ярилцлаганд бэлтгэж, туршлага сонирхол, skill set (чадварыг багц мөн үү?) - гэх мэтэд нь тохирсон ажлын байр олж өгсөн юм.

Хэдийгээр би резүмэ (CV)-ээг нь шинэчилж, ярилцлаганд бэлдүүлсэн ч тэр хүн өөрөө их хичээсэн. Миний зөвлөгөөг анхааралтай чагнаж, үг бүрийг тэмдэглэн авч байсан. Намайг сонсож ярилцлагандаа уйгагүй бэлдсэн.

Би өмнө нь олон хүмүүст зөвлөгөө өгч байсан ч яг энэ бүсгүй шиг тууштай хичээж, хүсэж буй ажлынхаа араас явсан нь цөөн.

Украйн бүсгүйг Нина гэж нэрлэе.

Нинатай анх танилцаж бага багаар мэддэг болох тусам миний арван жилийн өмнөх амьдралыг дэндүү их санагдуулдаг байв. Өөр шигээ урт зам битгий туулаасай гэсэндээ би хэрхэн туслахаа олж яддаг байсан юм.

Нина өчигдөрхөн машин зардаг хүн байсан бол өнөөдөр мөрөөдлийн компанидаа өмнө нь эх орондоо хийж байсан ажилдаа зөвхөн гуравхан жил энд цагаачилсаныхаа дараа орж чаджээ.

Маш их баярлалаа гэж орос англиар урсгах , бас мэгших эмэгтэй хүний, ээж хүний дуу утасны цаанаас дуулдана. Би арай л дагаад мэгшсэнгүй ...

Нинагийн охины ирээдүй улам гэрэлтсэн гэдэгт эргэлзэх зүйл алга.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

Дараах зургийг харих замдаа улаан гэрэл дээр амжиж дарсан юм.


Үүлнээс ч хүртэл таашаал авч чаддаг өндөр мэдрэмж бас байнаа байна гээд л онгирчихоё доо
 😏

Амьдрал сайхан сайхан биш гэж үү?

Машины цонх халтар байжээ. Уучлаарай :)

Намар, ээж хоёр

Уг нь би оюутан болчихоод хичээл хийх санаатай амралтын өглөө кофе чанах зуураа машинаа асаасан юм.

Гэтэл бодол тэнүүчилж алга болоод ер тогтож суулгах шинжгүй.

Энд Индиан Саммер эхэлж буй тул намар болж буйн тэмдэг үгүй. Есдүгээр сар хамгийн ихээр халах нь эхэндээ сонирхолтой санагддаг байснаа одоо ч бүр тоохоо байж.

Хэдийгээр намар болсоны тэмдэг агаарт мэдрэгдэхгүй ч сэтгэлд аяндаа мэдрэгддэг бололтой...

Мэдэхгүй би намрын охин болоод ч тэр үү хэзээний л намарт дуртай байсаар ирсэн билээ. Ямар сайндаа  Р. Чойномын Намрын тухай бодол шүлгийг бага ангидаа цээжилчихсэн л урлагийн үзлэгээр "Намар аа гэж юусан билээ" гээд л уншиж явах.

Намар хажууд ирчихээд байхад л , намар ээж хоёрыг хамтад нь үгүйлж, хамтад нь санах энэ сэтгэлийг яалтай.

Намрын өнгө орлоо ээж ээ
Насыг чинь нэмээд одлоо .. гээд дуучин Болормаагийн дууг одоо бүтнээр сонсох чадалгүй болтолоо би тэр хоёрыг санаж сууна.

Болдогсон бол би намрын улаан шаргал навчисын нэг болж газарт унаад нутгийн зүг үлээх салхинд дайгдаад ижийдээ очихсон.

Орчлон дээр юм бүхэн учир жанцан болоод цаг хугацаатай

Эерэг бодолтой өөдрөг байх гэж хичээж явахад хяссан юм шиг асуудлууд ар араасаа ундраад байх шиг санагддаг. 

Тэр үед хэрхэн амьдралтай зохицож, үргэлжлүүлэн эерэг сэтгэдэг вэ? Үүнд хариулт байвал блог болон FB дээр коммент бичиж үлдээгээрэй. 

Миний хувьд эхний таван минутанд шууд сэтгэлээр унаж "дахиад л" гэх бодол өөрийн эрхгүй төрдөг. Тэр сөрөг бодлоо анзаарангуутаа хэрхэн тэр байдлаас гарахаа тунгаана. Цааш нь ургуулан муу зүйл төсөөлөн бодохын оронд "үүнээс доор асуудал байсан бол яах вэ?" гэж тэр дор нь бодно. Ихэнхдээ тэр бодол тусалж аажмаар эерэг зүйлс бодож эхэлнэ. 

Хэрэв дээрх тархины дасгал үйлчлүүлэхгүй бол эерэг энерги, зөв бодол өгч, чиглүүлдэг найз, эгч, ах руугаа маш хурдан хугацаа алдалгүй холбогдоорой. Хэрэв асуудал чинь хэт том ярвигтай бол мэдээж сэтгэл зүйчид хандах нь тодорхой. 

Харин өдөр тутмын,  жижиг сажиг асуудлыг найдвартай, үргэлж зөв чиглэлд чинь залж байдаг хүнтэйгээ даруй холбогдсоноор сөрөг энергээс хурдан зайлсхийж чаддаг. 

Өнөө өглөө надад нэг асуудал гарлаа л даа. Миний анхны тархинаас гарсан үйлдэл бол "ө май гад!Одоо бас тэрийг яах билээ" гэж бодуулав. Нэгэнт эерэг бодлын хүчийг хэсэг хугацаанд тархиндаа дасгалжуулж буй тул тэр бодол орж ирмэгц "үүнээс дор байсан яах билээ" гэж хурдхан бодонгуут арай дээрдсэн ч сэтгэл бачуураад нэг л тайвшиирч өгсөнгүй. Тэгэнгүүт намайг үргэлж зөв чигт залж, сөрөг бодлыг өөрчлөхөд тусалдаг нөгөө "гялалзуур" найзруугаа хурдхан утас цохив. Азаар найз маань утсаа авлаа. Учраа амьсгаадан хэлтэл угийн тайван, сэтгэлийн хөөрөл багатай найз минь тэвчээртэй миний гомдоллохыг сонсоноо "дээрээс сорьж байгаа гээд л бодчих" гэж хэлэв. 

Дэвхцэж байсан тархи минь тэр дороо номхорч орхилоо ашгүй. 

Хэрэв бурханд итгэдэг бол дээрээс гэдгийг бурхан, үгүй бол хөх мөнх тэнгэр гэх мэтчилэн өөрийнхөө ертөнцөөр ойлгоорой. 

Нээрээ л дээрээс өгсөн сорилтыг даахгүй , сөрөг бодолдоо автагдвал улам уруудах мэт. Харин сорилтыг давж, бууж өгөлгүйгээр үргэлжүүлэн тэмцвэл амьдралаас шагнал хүртсэн мэт амьдрах ... 

Ингээд бодохоор эргээд л тоть шиг давтагдах "байгаадаа талархаж амьдрах", тохиолдсон асуудлыг хурцаар хүлээн авсанаас "үүнээс доор асуудал" байсан бол гэж бодох нь танд хичнээн амар амгалан, тайвшрал, эерэг энергийг авчрах нь харагдаад байгаа юм даа. 

Мини ажигласанаар бид бүхэн мөнх тэнгэрийн тавиланг өөрсдийн дураар өөрчлөх гэж заримдаа хэтэрхий тэнэглэдэг юм шиг.

 Орчлон дээр юм бүхэн учир жанцан болоод цаг хугацаатайг үргэлж умартаж, өөрийгөө болон өрөөлийг ихээр зовоох юм даа. 

Хөх тэнгэрийн хүсэлд тэрсэлсэн хүмүүс сайнаа үздэггүйг бид үүх түүхээсээ мэдүүштэй л хэрэг. 

Уучлаарай, ухамсарын доройтол гэхээс өөр юу гэх вэ?

Гэгээн, эерэг юм бичихийг хүсдэг ч заримдаа бүр толгойтой үс арзайтал дургүй хүрмээр зүйлс тохиолдох агаад нэгэнт блог маань миний өөрийн сэтгэл зүйн засал тул яах аргагүй бичиж байж санаа амрах гэнэ. 

Тэр тусмаа би монгол яваад ирсэнийхээ дараа аль болох шүүмжийн шинжтэй юм бичихгүй хэмээн хичээсээр ирсэн билээ. Гэвч энэ удаа зах зухаас нь уудлан задлахгүй бол далай дээр өнгөрөөх гэж зорьж төлөвлөсөн урт амралтын өдрөө эхлүүлж нэг л чадахгүй бололтой...

Цэвэрхэн сайхан цахилгаан шатны хаалга нээгдэнэ, хүлээж буй хүмүүс хоёр тийш ярагдан, буух хүндээ зай тавьж өгсөний дараа өөрсдөө ордогсон биш бил үү? Өөдөөс мангайгаад л хөшөө шиг ямар ч буух зай тавьж өгөхгүй зогсоод л байх юм. Гаднаас нь харахад таг хөдөөний хүн биш, бүр зарим нь ганган тансаг гэж жигтэйхэн, даан ч хажуу тийшээ зогсоод зай тавиад өгөхгүй нь хачирхалтай бөгөөд уушиг сагсаймаар гээч. 

Байрнуудын гадаах явган хүний замруугаа машинууд нь хэтэрхий тулж зогссон болохоор ганц хүн чүү айтай явах нарийхан зайтай. Гэтэл тэр зам дээр гурвуул дөрвүүлээ буу халаад тойрог болон зогсчих нь тэр. Хажуугаар нь тойрох гэхээр зай байхгүй, уучлаарай гээд зөрөөд гарах гэхээр тохойгоо хөндөлсчихөөд хөдлөх шинжгүй. Эхэндээ би бүр яахаа мэдэхгүй байдалд оров. Надтай зөрөх хүмүүст зай тавьж өгсөөр арай л бүтэн цаг хүлээсэнгүй. Ээлжлээд гарах ухамсах алга.  Сүүлдээ ч хажуугийн хайс энэ тэр даваад "гатлах" аргаа олсон л доо би. 

Хориотой зүйл дайж явуулах гээд чичрээд дайрчихна, ирсэн хойно эртхэн аваачиж өгсөнгүй гэж араас дарамтална. Үнэ мөнгөгүй тэр холоос аваад ирсэн юмыг эзэд нь ирж авна аа даа. 

Тив улсууд алгасаж аялаад, тасарсан ажлаа нөхөх гэж үүрийн таван жингээс үдшийн бүрий хүртэл ажиллаж, хажуугаар нь ар гэр, үр хүүхэд гээд эзэнгүй үлдсэн хүмүүстээ бас би чинь анхаарал тавьдаг юм байгаа биз дээ? 

Гэх мэтчилэн наад захын соёл, энгийн мэдрэмж (common sense )  байхгүй. За бүр мэдрэмжээ байгээ ерөөсөө би тэрийг УХАМСАРЫН ДОРОЙТОЛ гэж бодож байна.

"Хүүхэддээ вакцин хийлгэсэн гэсэн бичгийн хуурамчаар хийж " болох уу энэ тэр гэсэн зар энэ хавиар бас яваад байгааг харахад нөгөө ухамсарын доройтолтонгууд чинь тэр чигтээ ирчихсэн, ухаарах ч бодолгүй, засрая гэж хичээх ч сэтгэлгүй - монголоо доромжилж бараад амьдралыг нь өөд нь татаж буй гадны улсыг доройтлоороо бузарлаад л явж байх юм даа.

Сэтгэлгээний хомсдол, ухамсарын доройтлоосоо салахыг ядаж хичээдэг ч болоосой. Авна, ашиглана, иднэ, ууна, муулна, биеэ өмөөрнө ... 

Худалч, хуурамч юм бас их байна. Нөгөө угсардаг тавилгатай гэр гээд НААД гэдэг газрын зараад байгаа юм байна аа даа? Бодон байж хүүхэддээ авав. 159600 төгрөг орчмоор. 

Бөглөрөө, таглараанд нь гацахаас айгаад, тэгээд ч ээжтэйгээ өнгөрүүлэх нэг хором ч надад үнэтэй байсан тул утсаар яриад хүргэлтээр авч орхив. Мэдээж зургийг нь хараад дүрслэлийг уншаад чанар муу байж магад ч гэж хардах сэтгэл төрсөнгүй.

Монголд удаан амьдраагүйн бас нэгэн гор. Яахав энд ажил, бизнесээс эхлээд бүх зүйл итгэлцэл дээр явагддаг тул тэр орчиндоо дасчихсаны гай. Хардах, сэрдэх, хүнд эргэлзэх гэдэг юм байхгүй болсон хүн. Миний хохь болсон.

Нөгөө гэрээ ирээд одоо болтол босгох боломжгүй.

Учир нь тал тавилга нь эвдэрхий -чатаар хэлсэн чинь ""сүпер цавуугаар наачихад болно, шинэ тавилга гаргахаар аваарай" 

Хаалга нь бас эвдэрхий - чатаар хэлтэл "таны зурагнаас эвдрээгүй л харагдаж байна даа. Видео явуулая"

Маш, бүр маш муу чанартай юм. Надад үнэндээ дурслэх ч үг олдохгүй юм. Ариун цэврийн цаасны голоор хийсэн манай хүүхдүүдийн гар урлалаас ч хэврэг гээд бод. 

Яаж ийм сөрөг юмаар дүүрэн дуусгах вэ? Сайн сайхан юм зөндөө байлгүй яахав. Хотоос 30 орчим км газах яваад SKY FRIENDS гээд сайхан газар байх. Би монголд очих бүртээ л очдог юм. Яагаад гэвэл хотод ойрхон тэгсэн хэрнээ сайхан байгалийн дунд. Хойшоо харвал өндөр бөгөөд сонин тогтож бүхий уулс, урагшаа тал хязгааргүй үргэлжлэх тэнийсэн сайхан тал. 

Сагсны талбай, уралдааны машин, ширээний теннис, DJ тэй диско талбай, амрах өрөө, иж бүрэн гал тогоо, тохилог ариун цэврийн өрөө гээд бүх насныхан амралтаа зөв өнгөрөөх бололцоотой нь маш их таалагддаг. Энэ жил шинээр 10 хөөрхөн цоохор янзага нэмэгдсэн байна лээ. Өхөөрдмөөр амьтадыг хар даа

Мөн мэргэжлийн өндөр төвшний Солонгос, Монгол нисгэгч нартай хувийн онгоцоор Цонжин Болдог, Тэрэлжийн дээгүүр нисэхэд юутай сайхан гэж санана. Тэр л мөчид Монгол тэнгэрийнхээ ямар цэлмэгийг, сэмжин цагаан үүлс нь дэндүү гоёмсогийг, хөвч сайхан тал нь тансаг ногооныг сэтгэлд шингэж, зүүдэнд иртэл мэдэрдэг дээ. Тэрхүү торгон мэдрэмжээр зүрхээ цэнэглэж аваад дараагийн наадам хүртэл төрсөн нутгийн агаараар амьсгалах хүч чадлыг авдаг. 

Хайртай ээж, ах эгч, дүү нар бол ойлгомжтой. 

Бас нэгэн сайхан нь цөөн боловч чанартай хэдэн найз нар маань миний завгүй хуваарьт тааруулан бүгд өөрийн чухал бүхнээ зохицуулан уулзсан явдал байлаа. Яасан ч мундаг найзуудтай юм би, ямар ч сайхан сэтгэлтэй юм тэд нар минь. 

Бүгдэд нь баярлалаа. 

Аа хамгийн сүүлд нэг хөгжилтэй зүйл хуваалцая. Тээр жил, нэлээн хэдэн жилийн өмнө намайг монголд очиход ажаа, аниа гэж дуудаад гээд бичиж байсан даа?  Гэтэл энэ удаа нэлээн хэдэн хүн надаас "оюутан уу?" гэж асуусан. Би худлаа яриагүй шүү :) 

Дан биеэрээ, бас сэтгэл санааны байдлаас болоод монголд буухаасаа өмнө хэд хоног хоолойгоор юм даваагүйнх жин ч зөндөө хассан байсныг хэлэх үү ... за за ерөөсөө залуухан оюутан охин шиг харагдсан нь үнэн байх оо гээд итгэчихсэн нь дээр ч юм үү? 

Хоргодохын хамт тэмүүллийг бас би мэдэрлээ

Хоргодох бас тэмүүлэхийн хоёр тэс ондоо мэдрэмжийг нэг доор амссан долоодугаар сар байлаа.

365 хоногийн дотор хүний амьдралд ёстой л түмэн зүйлийн үйл явдал тохиолддог аж.

Яг нэг жилийн өмнө гэр бүлээрээ аз баяртайгаар Азийн зүг жолоо залж, төрсөн нутгийнхаа шороон дээр хүртэл хөрвөөгөөд авсан сайхан дурсамжаар дүүрэн аялал байлаа.

Харин энэ жил цаг хугацаатай үхэн хатан өрсөлдсөөр онгоцоноос онгоцонд, далайгаас ууланд, тивээс тив алгасан исэж явна.

Ай даа онгоц хэмээх гайхамшигт унаа түүнийг жолоодох нисгэгчийн алдар бадартугай!  Та наргүйгээр би яахсан билээ ...

Ёстой л нөгөө дээл нь сэмэрч, үс нь цал буурал болсон ээжийдээ хоргодох авч нүд нь бүлтийн, өмөлзөж намайг санах үрдээ тэмүүлэх сэтгэлийг яалтай.

Арай л дэндүү алсад амьдрах хувь тавилангийн хэцүүг анх удаа л ээжийгээ өвдөхөд мэдэрлээ. Нисээд нисээд барагддаггүй яасан ч хол газар вэ? Өмрөөд өмрөөд тогтдоггүй ямар гээч сэтгэл вэ?

За тэгээд нэг л зовсон хүн явна гэж битгий туйлширч ойлгоорой доо. Би зүгээр л энэ сонин – хоргодох бас тэмүүлэх мэдрэмжийг арилж одохоос нь өмнө цааснаа буулгах гэж л мөнгөн хүлгийн нүсэр чимээг үл тоон үсэг цохин сууна.

Юманд бүү ам гарч бай гэж монголчууд ярьдаг. Би хэдэн удаа Хятадаар дамжиж Монгол ниссэнийхээ дараа чухам дахиж хэзээ ч үүгээр дамжин өнгөрөхгүй гэж “хуцаж” байснаа бодохоор уучлал гуймаар. Гэнэтийн явдалд аминд орж намайг аюулгүй зорчуулсан Айр Чайна, МИАТ, Юнайтад Айрлайнд баярлалаа.

Хүний амьдралд маргааш, нөгөөдөр, дараа сар, жилийн дараа юу ч тохиолдож болно. Тийм учраас ингэхгүй, тэр хүнтэй уулзахгүй, энэ газар очихгүй гэж хэзээ ч хэлэхгүй нь дээр юм байна шүү!

Бид настануудаа яаж амьдруулаад байдаг юм бэ? 

Манайхан евро америкийн хүмүүсийг эх эцгээ дэргэдээ байлгаж асардаггүй гэж ирээд л "муулах" дуртай байдаг. Гэтэл бид өөрсдийнхөө өвөө, эмээ, эцэг эхээ хэрхэн асарч өргөдөг вэ? 

Хажуу байлгадаг ч чухам амьдралын чанар чансаа хэр байдаг вэ? 

Өдөржин хоосон гэр сахина эсвэл үр хүүхдэд нь бараа болно. 

Гэтэл өнөөх муулаад байдаг гадаадынхан хэдийгээр гэртээ байлгадаггүй ч ганцааранг нь гансартал байлгахгүй нь сайхан юм даа. 

Хөгшидийн нийтийн байранд хөгжим, дуу хуур, тоглоом наадгай, сувилагч асрагч гээд хэрэгтэй бүхэн нь байх агаад эдгээр нь настай хүмүүст, өвдсөн хүмүүст эмнээс ч илүү чухал зүйлс байдаг. 

Тэр тусмаа монгол настай хүмүүст хобби байхгүй, хоббий байсан ч түүнийгээ хөөж хийх боломжтой хэд билээ? Хамт олон гэж байхгүй, найз нөхөд байлаа ч байнга уулзах нөхцөлгүй гээд яривал их зүйл байна. 

Бид ер нь яаж тэднийгээ асарч хайрладаг улс вэ? Ач тусыг нь л авахаас эргүүлээд тэднийхээ төлөө юу хийдэг хүүхдүүд, ач зээ нар вэ? 

Уг нь тэр авах гээд байгаа ач тус нь нэг их юм биш шүү дээ. Хэдэн үг сайхан солилцож сэтгэлийг нь онгойтол ярилцаад, аяга хоол хамт сууж идэхэд л болчих гээд байгаа юм. Бололцоо чинь байвал их хотын чимээнээс түрхэн холдуулж, агаар салхинд хэдэн минут гаргаад ирвэл бүр болох нь тэр. 

Тэрнээс нэг их мөнгө ороод сүйд болоод байх юм байхгүй. Яахав ээждээ ганц бандааж бариад очвол их л буян болж ирдэг юм гэсэн. 

Эцэг эх, үр хүүхэд, хань ижил, дотно найздаа өгч чадах хамгийн том бэлэг бол чиний цаг байдаг. 

Цаг хугацааг хамт өнгөрүүлсэн нэртэй ч ухаан санаа, бодол чинь хамт биш FB ухаж, утсан дээр дүүжлэгдвэл бас биш. 

Миний  талархалыг хүлээгээгүй нэгэн монгол сувилагчийн тухайд товчхон.

Харваас өндөр настай хүн зүрхний шигдээс болж буй бүх шинж тэмдгээ арай ядан хэлэн хүйтэн хөлс нь тасралтгүй урсан арай хийн амьсгалж байхад ямар ч арга хэмжээ аваагүйгээр зогсохгүй эмч хүн түүнд “наад хүн чинь зүрхний шигдээс болж байх шиг байна, яаралтай тусламжинд хурдан хүргээд өгнө үү?” гэхэд миний ажил биш гээд сууж байсан хүнийг сувилагч гэж нэрлэхэд бэрх. Чам шиг сэтгэлгүй, мэргэжлээ эзэмшээгүй, зүрх сэтгэлгүй хүнээс болж хүн үхэж байна. Чамд хүний амь аврах хэдхэн минут байгааг ойлгох ухамсар байхгүй л дээ. Болдогсон бол чамайг би буудчихмаар байна. Гэвч чам шиг хүмүүсийг хувь тавилан чинь цаанаас нь хэзээ нэгэн цагт хатуу шийтгээд өгөх нь тодорхой.

Түүрүүлсэн бөхөд биш хүний амь аварч буй эмч нараа тэр хэмжээгээр шагнахсан 

Эмнэлгийн бус салбарт амжилт гаргасан одод, тамирчидаа өндөрөөр шагналаа гэж их дуулддаг. 

Харин хүний амь аварч буй хэдэн эмч нараа шүүмжлэхээс өөрөөр хэрхэн урамшуулж, амьдралд нь хэрэгтэйгээр шагнадаг вэ? 

Монголын улс төрч, эрх баригчид, бизнесменүүд нэг зүйлд хөрөнгө оруулбал өөрсөдийнх нь гэр бүлд, хүн ардад хэрэгтэй юм шиг санагдасанаа бас бичихгүй өнгөрч болохгүй санагдлаа.

Хэрэв хэн нэгэн хайртай хүн тань, эсвэл та өөрөө судасны бөглөрөл болоход ( миний ойлгосноор харвалт, зүрхний шигдээс) түүнийг оношилж, судасны бөглөрлийг нээдэг ангиографи машин яг одоогийн байдлаар зөвхөн 3-р эмнэлэгт байдаг юм байна. Тиймээс хэрэв тэнд амжиж л очихгүй бол үхэл алхмын цаана аж. Мэдээж бүхэл бүтэн улс даяар ганцхан аппарат, түүн дээр ажилдаг 1 –3 эмч байдаг гээд бодохоор ямар их ачаалалтай нь илт. Би үнэндээ тэдгээр эмчийг биширсэн. 

Маргааш гэж хойшлуулж байтал сэтгэлийн нар чинь нэг мөсөн жаргачих вий дээ

Завгүй, ажилтай, бололцоогүй, амжихгүй өнөөдөр гэж үнэн худалдаа баригдан бүхнийг хойшлуулж явтал маргаашийн нар мандахтай зэрэг сэтгэлийн нар чинь хэзээ ч дахин мандахгүйгээр нэг мөсөн жаргачихсан байх вий дээ. 

Ижийтэйгээ ойрхон амьдардаг бол нэг цагийг ч хойшлуулалгүйгээр яваад очоорой. Замын бөглөөнд гацсан ч гэсэн яг одоо гараад явбал өнөөдөртөө лав багтаж очно оо. Ижийтэйгээ ойрхон амьдрах хувь заяанд чинь алс холд амьдрах тавилантай бид хэд чинь сэмхэн атаархаж, нулимсаа эдээр хуурах гэж оролддог хөгийн ч амьтад аа.

https://www.youtube.com/watch?v=AiftvjtV9i4&t=185s

Эзэн хичээвэл заяа хичээдэг бөгөөд хэзээ ч бүү шантар!

Амьдрал хэмээгч "галзуу хулгана" заримдаа юунаас ч үл хамааран хаашаа хамаагүй давхиж оддог. Гэсэн ч би эзэн хичээвэл заяа хичээнэ гэдэгт итгэдэг.

 Мэдээж бүх юм үргэлж бодож, төлөвлөсөний дагуу бүтээд байдаг бол амьдрал ямархуу гунигтай өдрүүд болж хувирах бол?

Сайн хүнд ч муу зүйл тохиолддог. Тэглээ гээд муу хүн болж хувирахгүй байхад л утга оршдог юм шиг ...

Манай хотын зарим гудамжууд нэлээд нарийхан л даа. Хоёр талаар машин зогссон байвал зөрөлдөн өнгөрөх машин нэг нэгэндээ зай тавьж өгөхгүй бол мань мэтийн жолооч нар эсрэг урсгалын машинаа шүргэж мэднэ. Ихэнх хүсүүс, багцаалбал 98 хувь нь зам тавьж өгнө. Үлдсэн хоёр хувь нь өөдөөс зайгүй байхад дайраад л байна. Эсвэл заавал зам тавиулах гэж гүрийнэ.

Би бол үргэлж зам тавьж өгөх хэсэгт орох ба зам тавьж өгсөн хүнд гараараа дохиж баярласанаа илэрхийлнэ.

Энэ мэтчилэн жижигхэн зүйлст хэрхэн хандахыг хорвоо ямагт ажиж байдаг ч юм шиг. 

Ээж маань хүнд өгөх юм байхгүй бол өөрийнхөө хоолноос илүүчлэн өгч бай гэж хэлдэг. Хэдийгээр зөвхөн хоолон дээр жишээ болгон хэлсэн ч үүнийг бүх зүйл дээр баримталж болно гэж би санадаг. 

Манай нөхөр үргэлж хүмүүсийг ялгаварлахгүйгээр ижил тэгш хандаж, үнэн сэтгэлээсээ харилцаж байхыг надад сануулна. 

Хүнд тусална гэдгийг заавал том хүрээнд ойлгох хэрэггүй. Мэддэг юмаа нэгэндээ хэлж өгөх, байгаа юмаа хуваалцах, заримдаа баярлалаа гэдгийг чин сэтгэлээсээ хэлэхэд тухайн өдөр тэр чигтээ сайхан болж  хувирдаг.

Чадал, бололцооныхоо хэрээр хүнд тус хүргэж явахыг амьдралынхаа зарчим болгохыг чармайж явна даа. 

Мартсанаас мал мэнд үү гэгчээр зургаан сар шантралгүй хичээсний ачаар нөгөө мөрөөдөөд байсан газраа хүсэж байсан чиглэлээрээ орчихсон шүү :)

Өчигдөр сайхан өдөр байлаа. Гүүглд ажилдаг Баттулга тэргүүтэй мундаг залуус намайг халуун дулаан инээмсэглэл, монгол хүний дотно сэтгэлээр грүпдээ хүлээн авч, завгүй цагаасаа үл харамлан уулзацгаав.

 Силикон Валли буюу Mountain View (Sunnyvale хот бас орно) -д зургаан шижгэр сайхан, залуу монгол инженерүүд ажилдаг юм байна. Хоёр нь эмэгтэй гээч. Сийатл хотод хоёр залуу бас инженерээр ажилдаг бололтой.

Монгол залуучуудаараа үнэхээр бахархаж байна аа.

Би ч яахав нөгөө тоон дотор үсэг цохиж явна гэдэг шиг л юм болж байна. Юутай ч атугай Валлидаа л үлдэх учиртай байсан бололтой. Манай хуучин компани миний шинэ ажлаас машинаар яг гуравхан минутын зайтай юм гээч.

Олон арван, содон сонин адал явдал, туршлага, шинэхэн найзууд, тэс ондоо хамт олон, цоо шинэ ажлын салбар гээд сэтгэл догдолсон өдрүүд ар араасаа цувраад эхэлчихлээ.

Мөрөөдөлдөө хүрэх хол хэдий ч ямар ч байсан зөв замдаа орох нь орсоон. Үргэжлүүлээд мөрөөдөөд л байдаг хэрэг.

Хоёр чухал зүйл.

1. Мөрөөдөхөө зогсоож үл болно
2. Галзуу хулгана галзуурах мөчүүдэд шантарч үл болно 
( you have no idea what I have been through )

Амьдрал яг л галзуу хулгана шиг

Амьдрал яг л "галзуу хулгана" шиг... Дээшээ, доошоо, огцом өөдөө, тэгснээ уруудана, хажуу тийшээ, байран дээрээ эргэлдэнэ, байсхийгээд сэгсчүүлнэ.

Саяхан манай гэр бүл family rule буюу гэр бүлийн дүрэм гэртээ батлан гаргав. Загвар нь ерөнхийдөө иймэрхүү
Жишээ нь:
 "more "илүү ихээр
 ном уншина, инээнэ, сэтгэгдэлээ хуваалцана, мэдрэмжээ нээнэ, дасгал хийнэ гэх мэт.
"less"аль болох бага 
уйлагнана, гуншигнана, муу хоол иднэ гэх мэт
"okay to be:" "ингэж болно"
уйлж болно
уурлаж болно
гуниглаж болно гэх мэт
"no" болохгүй 
нэгнийгээ үгээр болон биеэр өвтгөж болохгүй
нууц байж болохгүй
худал хэлж болохгүй
дээрэлхүү, муухай ааштай байж болохгүй
орилж, хашхирахгүй гэх мэт

Хүнд ер нь баримталдаг зарчим гэж байдаг. Нүдэнд харагдахуйц бичээд өлгөчихөөр өөртөө үнэнч байхыг илүүд хичээгээд их аятайхан юм гээч.

Галзуу хулгана уруудах үе хүн бүхэнд бий. Нэг өдөр уйлж болно, хоёр дахь өдөр гуниглаж болно. Харин гурав дахь өдөр урвайсан хэвээр унтаад байж л болохгүй. Би үргэлж хэлдэг дээ? Аливаа хүнд хэцүүг туулан гарах хүч чадал буюу сэтгэлийн тэнхээтэй байх хэрэгтэй. Тэрхүү сэтгэлийн хатыг өөрөө бүрдүүлж чадаж гэмээнэ үр хүүхэддээ сургаж үлдээх боломжтой.

За би сайндаа ч биш сарын өмнө 'Option B' гээд Шерил Сандбергийн бичсэн номыг уншаад дээрх санаа төрсөн юм.

Сүүлийн хэдэн жил би хүүхдийн хүмүүжил, хүүхэд өсгөхтэй холбоотой маш олон ном уншиж судалдж байгаа хүн л дээ. Хэдийгээр дээрх ном хүүхэд өсгөхтэй шууд холбоогүй ч маш чухал санааг агуулсан байсан юм.

Хүний амьдралд хэцүү зүйл тохиолдоход хүн хэрхэн туулж гарах чадвартай болох талаар энэ номноос их зүйл сурлаа.

Хүүхдээ хэрхэн амжилттай хүн болгох уу? Яаж хичээлдээ сайн хүн болгох уу? гэх мэт зүйл дээр хэт анхаарч харин амьдралын үнэнээс аль болох зугтуулан өсгөх хандлага заримдаа эцэг эхчүүд бидэнд гардаг. Амьдрал заримдаа галзуу хулгана шиг гэдгийг хэтэрхий хожуу ойлгуулах үе бий.

Хүүхэд сургуульд орно. Дээрэлхүү нэгэн таарна. Тэр бүгдийг хэрхэн хүлээж авах, яаж даван туулах чадварыг хэр их олгож байгаагаа бодолцох хэрэгтэй.


Галзуу хулганаар амжилттай - хамгийн гол нь эрүүл, сэтгэлийн зовлонгүй аз жаргалтай аялах нь чухал. Хэнтэй хамт аялж байна, хэн нэгнээ хэрхэн дэмжиж, ямар үлгэр дууриал өгч байна гэдгээс асар их зүйл шалтгаалдаг.

Ээж маань үргэлж хүүхэд бол чиний толь гэж хэлдэг юм. Хүүхдээ ямар хүн болгох нь эцэг эх, гэр бүлийн хүмүүжлээс маш их хамааралтайг л ойлгож үр хүүхэддээ үлгэр дууриал үзүүлэн амьдрахыг л хичээж явна даа.

Ай даа хүн тээж төрүүлэх нэг ондоо, хүний эцэг эх байна гэдэг бас л чанга алба шүү.

Америкт аятайхан амьдарч, амжилтанд хүрэе гэвэл

1. Худал бүү хэл

Их, бага хэмжээгээр хэнд ч хэзээ ч бүү худал хэл. Яаж ч байсан мэдэгдэнэ. Бүх юм систем, логик дараалалтай тул худал хэлж өөрийгөө эвгүй байдалд оруулавзай. Хамтрагчийнхаа, даргынхаа итгэлийг нэг удаа алдахад таны ирээдүйн замд сайнаар нөлөөлөхгүй. 

2. Хууль дүрмийг дага

Хуурамч, хулхи үйлдэл нэг л өдөр баригдана. Хоёрын хооронд юман дээр хүнийг хуурч буй мэт боловч өөрийгөө хуураад хэрэггүй. Жишээ нь зарим хүмүүс карпүүл эгнээний дүрмийг байнга зөрчдөг. Тэр байтугай нэгэн хотын монголчуудын груп дээр хэрхэн хажуудаа хиймэл хүүхэлдэй суулган дүрмийг амархан зөрчдөг “алтан туршлага”-аа  оруулсан мэдээллийг хараад нүдэндээ итгэхгүй өнгөрч байсан юм. 

Карпүүл эгнээ нь 2 буюу түүнээс дээш зорчигчтой машин явдаг эгнээ бөгөөд утга нь олон машин тусдаа унаж агаар бага бохирдуулаагүйг чинь сайшааж хурдан явахыг тань дэмжиж байгаа бодлого. 

Энэ оронд сайхан амьдрах гэж ирсэн бол хууль дүрмийг нь дээдэлж байж л сайн сайхныг нь олж авна даа.

3. Хэлээ сайн сур

Гадаад хэлийг хамгийн хурдан сурдаг гурван аргын нэг орчинд нь амьдрах байдаг. Хэрэв Монголчуудтайгаа хамт ажиллаж, хамт амьдраад сурах орчин багадвал дараахыг хийгээд үз:

- Монгол нэвтрүүлэг байнга үзэхийн оронд Англи хэл дээр нэвтрүүлэг, кино үз.

- Монголоор ярьдаггүй хүмүүстэй цаг өнгөрөөх арга олох, найзлах. Жишээ нь сонирхолынхоо дагуу meet up goup -т оролцох, дасгал хийдэг хүмүүстэй нэгдэх, хүүхдийнхээ сургуулийн эцэг эхийн байгууллагад оролцож хүмүүстэй харилцах хүрээгээ тэлэх

- Номын сан, төрийн бус байгууллагад долоо хоногт нэг удаа сайн дурын ажил хийх

4. Туршлага хураа 

Ажил, амьдралын туршлага хураа. Туршлагыг үнэлдэг орон тул нэг зүйлийг маш сайн чаддаг байхад тэр чиглэлээрээ дээшээ ахих боломж маш их. Мэдээж сурах бас чухал. Гэхдээ туршлага боловсролоос дутахгүй шүү. Тэр тусмаа монголдоо боловсрол эзэмшсэн бол түүн дээрээ дөрөөлөөд туршлагаа нэмсээр байхад очихыг хүссэн түвшиндөө амархан хүрнэ. Амьдралын чинь төлөвлөгөө, нөхцөл байдалд нийцвэл юу хийх сонирхолтойгоо сонгоод сур. Сурахад хэзээ ч оройтохгүй гэж ярьдаг шүү дээ.

5. Өөрийнхөө төлөө зүтгэ 

Хүний төлөө амьдарч буй мэт сэтгэлгээтэйгээр Америк оронд хүссэн хэмжээндээ очтол сайхан амьдарна гэдэг юу л бол. Үе үе монголчуудаас маань илэрдэг “тэнэг их зан”, ego буюу биеэ хэтэрхий тоосон зангаа багасгахгүйгээр нийгэмтэйгээ хөл нийлүүлэн алхаж, бусдад хүндлэгдэн, өндөр амжилтын эзэн болно гэдэг тун чиг ховор. Бусдыг чамд тусалсангүй, ингэж дэмжсэнгүй гэж гомдоллохын оронд өөрийнхөө төлөө зүтгэ, асуу, араас нь сурагла. Энд хэн ч чиний араас хөөцөлдөхгүй. Чи л араас нь хөөцөлдөх хэрэгтэй. 

6. Шаргуу хөдөлмөрлө

Тууштай, шаргуу хөдөлмөрлөж чадвал өгөөжийг нь амархан амсах боломжтой орон. Хуучин чадвараа ашиглаж болно, шинэ чадвар нэмж олоод залхуурахгүй ажиллаад байвал мөрөөдөлдөө хүрэхэд ч харьцангуй ойрхон газар. Боломжийг бүү алд. 

7. Эрүүл бай 

Бие, сэтгэл, оюун санаагаараа эрүүл саруул байхын тулд бүхнийг хий. Тогтмол дасгал хий, эрүүл хоолло, тайван бай. Эрүүл мэндийн сайн даатгалд хамрагд. 

8. Үнэнч бай 

Ерөнхийдөө НЭГ, ХОЁРТОЙ холбоотой. Энд хувийн, хувьсгалын, том, жижиг бүх бизнес итгэлцэл дээр тогтдог. Тиймээс үнэнч байх маш чухал. Бидний ярьдгаар Америкууд юуг ч анзаараагүй мэт царайлдаг ч хэн ажлыг үнэн сэтгэлээсээ хийж байна гэдгийг аль хэдийн мэдчихсэн л байдаг.

Одоо ч бидний ирж байсан үеийг бодвол сайхан болжээ. Төрөл бүрийн сошиал медиа, груп, төрийн бус байгууллагуудаас хэрэгтэй бүх мэдээллээ олохоос гадна өөр хоорондоо нетворкинг хийх өргөн боломжтой, нээлттэй мэдээллийн цаг үе иржээ. 

9. Нэр хугархаар яс хугар 

Эхний таарсан Монгол хүний талаарх сэтгэгдэл ямар байна?  Бусдад яг тэгэж л ойлгогдох тул дотроо бодолтой амьдарч, эх орны нэрээ өндөрт өргөхгүй гэхэд муугаар хэлүүлэхгүй явцгаая. Өдөр тутмын амьдралаа зөвөөр залж, сайхан үлгэр жишээ болон амьдарч,  эх оронч сэтгэлгээгээ энд л гаргаасай гэж хүснэ. 

Найз

Чиний хувьд найз гэж хэн бэ? 

Багын найз, ажлын найз, гэр бүлийн найз, ганц найз, дотно найз, эгч дүүс шиг найз, багш-шавь найз гээд надад олон төрлийн найз бий. 

Тэдгээрийг ялгаж, дугаарлах аргагүй. Бүгд өөрийн гэсэн онцлогтойгоор хүний амьдралд тус тусын байрыг эзэлнэ. 

Чамайг бүдэрч явахад урам өгч,  "тийм хүн болно оо " гэхэд зүгээр л итгэн чадна аа гэж зоригжуулдаг,  асуудал гарвал юу ч бодолгүйгээр хуваалцдаг нэг тийм - чин сэтгэлийн найз та нарт бий юу? 

Ердөө гуравхан долоо хоногийн өмнө миний найз мөн ч юм шиг биш ч юм шиг хэмээн гайхширч байсан хүнийг би мөн ч дутуу таньжээ. 

Би зөндөө бодлоо. Дахин давтан бодлоо. 

Заримдаа хэнэггүй нь хэтэрчихсэн мэт санагддаг байсан тэр л найз минь сүүлийн хэдэн жилд нууцыг минь чандлан хадгалдаг, сэтгэлийг минь сонсож намайг тайтгаруулдаг, урам өгч намайг зоригжуулдаг, үнэнийг нуулгүй хэлж орхидог, миний төлөө чин сэтгэлээсээ баярладаг найз минь ажээ. 

Чи миний дотны сайн найз минь мөнөөсөө мөн шүү! 

Эмэгтэй найзад баймгүй нэгэн сайхан чанар энэ найзад минь бий. Хэзээ ч, ямар ч нөхцөлд хүн муулдаггүй. Хэдийд ч, юу ч боллоо гэсэн тэр ингэсэн, энэ тэгсэн гэж жижиг, том хов ярьдаггүй хүн. 

Биширмээр чанар. Би суралцах гэж мөн их хичээж байгаа. Ай даа бас амаа хамхих хэцүү шүү заримдаа. Ядаж ойр тойрныхоо хүмүүсийг "муулахаа" больчихвол учиртай. Холливуудын ховыг бол ярьсан шиг ярьж стрессээ харин ч нэг тайлахгүй бол болохгүй. 

Олон арван жилээр, болвол мөнхөд үерхэх BFF минь байгаарай. 

Холбоотой бичлэг

Гүүглий гүүглэр

Би ер нь Google Fangirl л доо. Арван хэдэн жилийн өмнө Гүүгл хэрэглэгчийн судалгаанд оролцож анх удаа кампус дээр нь очиж байлаа. Түүнээс хойш Gmail, Google hang out, Google Calendar,  Google drive (Google photo, Google map, Google doc) Youtube гээд Гүүглийн том бүтээгдэхүүний үнэнч хэрэглэгч болсон юм. Сүүлд нөхөр Гүүглд цөөн жил ажилласанаар хэдэн удаа зочилж, дотоод нарийн ширийнээс бага сага мэдэрч Google Fangirl-ийн сэтгэлгээ улам батажсан түүхтэй.

Силикон Валлийгийн бүх л старт апууд Гүүглийг жишиг болгон компанийн  соёлоо хүртэл үүсэгдэг. Валлигийн хүн бүхэн л битүүхэндээ Гүүглий Гүүглэр болохыг мөрөөднө. Би ч хэдэн жил Валли рүү давхисных Гүүглд ажиллаад үзэхсэн гэдэг нухацтай бодол тээсээр бараг жил болох нь.

Ингээд би өнгөрсөн 11 сарын 21-нд зориг гарган Гүүглд орох аппликейшн бөглөж орхив.

Ингээд би судалгаагаа эхлэв. Жилд 2-3 сая хүн ажилд орохоор аппликейшн бөглөдөг, зарим хүмүүс цөхрөлтгүй янз бүрийн захидал шуудангаар үргэлж илгээдэг, ярилцлагын асуултууд бусад газрынхаас тэс ондоо, маш хэцүү гэх мэт маш олон мэдээллийг зөвхөн хайлтын системээр хэдэн арваар нь олдох боломжтой аж. Та бас хайгаад үзээрэй.

Youtube-ийн бичлэг, блог, нэртэй сонингууд дээр гарсан мэдээлэл, нийтлэл гээд миний судалгаа үргэлжилсээр нэг мэдэхэд он гарчихсан байв.

Гүүглд ажилд орох процессийг судлах тусам миний аппликейшн сонгогдохгүй нь улам тодорхой болж сүүлдээ бүр мартаж орхиод Мексикийн хойгт амархаар нисэж одлоо.

1 сарын 5-ны өглөө утсаа нээтэл "Хелло фром Гүүгл!" гэсэн имейл байж байдаг байгаа.

Tess, чиний resume их сонирхолтой санагдлаа. Эхний шатны утасны ярилцлаганд орохыг урьж байна. Энд дараад боломжтой цагаа сонгоно уу гэх маягийн миний таньдаг хүнээс ирсэн мэт дотно үгтэй имейл байв.

Би эхний ярилцлагыг ямар ч бэлтгэлгүй өгсөн ч азаар даваад гарчихав. Ганцаараа бараг л нулимс дуслууллаа.

Эхний ярилцлаган дээрээ дөрөөлж, судалгаагаа сэргээгээд галзуу хүн шиг л ганцаараа ярьж хэд хоног яс бэлдэв.

Ярилцлаганд бэлтгэх аргууд (илүү мэдээлэл хэрэгтэй, ярилцалаганд бэлдэх тадаар зөвлөгөө авах бол надтай холбогдож болно)

• асууж болох асуултуудаа жагсааж хариултаа бичиж бэлдэх
• хайлтын систем ашиглан боложтой бүх мэдээллийг судлах - хүмүүсийн бичсэн форум, ярилцлага, ярилцлагын дараах сэтгэгдэл гэх мэт 
• тухайн компаниа маш сайн судална 
• бэлдсэн бичвэрээ өөрийн болгохын тулд өөрийнхөө дууг бичиж эргэн сонсох маягаар алдаагаа засаж дахин дахин бичлэг хийж сонсох
• найз нөхөд, гэр бүлийнхэндээ асуух асуултаа өгч харилцан ярилцаж бэлдэх 

Бидний хувьд Англи хэл эх хэл маань биш тул дуудлага, үгийн баялагаас эхлээд бэрхшээл их байдаг. Тийм учраас бэлтгэл зайлшгүй чухал. 

Өнөөдрийн Америкийн ажлын маркет дараах ерөнхий дараалалтай. Мэдээж тухайн байгууллагаас хамаараад зарим нь үүнээс олон эсвэл цөөн дамжлагатай байна. 

• Эхний ярилцлага буюу initial phone screen
• Утасны ярилцлага talent багийн ахлагч эсвэл program manager 
• Ирээдүйн менежертэйгээ утсаар ярих 
• Onsite буюу компани дээр биеэрээ ярирцлага өгөх (1-2 хүн, Гүүглийн хувьд инженер биш ажлын байранд дунджаар 3-5 хүнтэй нийт 4-5 цагийн ярилцлага)

Хоёр дахь ярилцлага илүү хүнд байлаа. Зарим асуултыг нь үнэндээ 100 хувь ойлгоогүй ч бэлдсэний хүчээр гацаж түгдрэлгүй давлаа.

Хэрэв энэ багийн бүх хүмүүст миний профайл таалагдвал дараагийн шат нь onsite буюу очиж биеэрээ хэдэн хүнтэй уулзах бүтэн өдрийн шахуу ярилцлага аж.


1. Тухайн хүний профайл, резүмэ таалагдвал  (нөгөө 2 сая хүн дотроос шүү дээ нэг ажилд багцаагаар 500 хүн гэсэн харьцаатай үздэг юм билээ) холбогдоно. Тэгээд эхний хүнд утсаар ярихдаа ер нь хүнийхээ хувьд боломжийн гэдгээ нотолж чадвал 2 дахь хүнтэй ярих магадлал гарна. Эхний хүн надтай ярьсан, өөрийн хийсэн судалгаа хоёроо нэгтгээд 2 дахь хүнд танилцуулна.
Эхний хүний судалгаа маш чухал бололтой. Энэ судалгааг ихэнх компаниуд хийдэг. Гэхдээ мэдээж Гүүгл өөрөө аугаа мэдээллийн уурхайн дээр, интернетийн хайлтын системээр тухайн нэр дэвшигчийн талаарх бүх л мэдээллийг олоод судалчихна. Тийм учраас сошиал медиагаар юу бичих, тэр ч байтугай холбоотой хүмүүс чинь ямархуу хүмүүс болохыг хүртэл судалчихдаг ажээ.
2. Хоёр дахь хүнд эхний хүний танилцуулсан нэр дэвшигч таалагдлаа. Ингээд надтай утсаар ярих явцдаа би чамд энэ ажил тохирно гэж бодож байна гээд түүнтэй холбоотой асуултууд бас асууна. Тэгээд ярилцлага амжилттай өгсөн нь андашгүй болно. Би чамайг багийнхаа хүмүүст танилцуулна. Хэрэв тэдэнд таалагдвал дараагийн шатанд урих болно.

Би ерөнхийд нь нэлээд товчилж бичлээ. Энэ хүртэл миний хийсэн дүгнэлт:
- Гүүгл үнэхээр хүний цагийг үнэлж чаддаг нь харагдсан
- Дээр дурьдсанчлан миний орох гээд байгаа тэр ажлыг би хэзээ ч хийж байгаагүй, туршлагагүй ч тэд миний давуу талыг тэр олон мянган хүн дотроос олж харсан

Гүүглд ажилд орохыг Харвардын их сургуульд тэнцэж орохоос ч хүнд гэж ярьдагийг би судалгаа хийх явцдаа олж мэдсэн юм. Хэрэв энд эртхэн ирсэн бол эсвэл энд төрсөн бол Харвардад суралцах байсан гэж хааяа "тэнэглэдэг"миний хувьд Гүүглийн ярилцлагын 2 шатыг давсан нь наддаа л чамгүй амжилт.

Одоо ямар ч газрын ярилцлагыг "энэ" шинэ чиглэлээр өгөхөд чөлөөтэй давах хэмжээний бэлтгэл, туршлага, энергийг Гүүгл надад өгсөн.

Хүний амьдралд тохиолддог зүйлст цаг хугацаа байдаг гэдэгт би улам итгэх боллоо. Мөн амьдралд тохиолдсон зүйлс ч тухайн хүндээ ямар нэг сургамж өгөх гэж тохиодог гэж би боддог.


Тэгээд би ямар санааг хэлэх гээд ингээд нуршаад байна вэ гэвэл өнөөдөр чамд ямар ч асуудал, даваа, бэрхшээл тохиолдсон байж болно оо. Хэзээ ч бүү шантар. Битгий гунигла. Өглөө болоод нар манддаг шиг чамд тохиолдсон бэрхшээл нэг л өдөр түүх болон үлдэж, чи зовлонг, амьдралын хатууг даваад гарчихсан л инээмсэглэж байх болно.

Амьдралд асуудал тохиолдсон үед талархалын дасгал хийх их хэрэгтэй юм шиг санагдсан. Би утсандаа Zest гэдэг аппаар тухайн өдөрт талархаж буй зүйлсээ бичиж байгаа. Яг ингээд хэдхэн секунд зориулаад бодохоор амьдралд сайн сайхан зүйл маш олон гээч.

Энэ миний Нэгдүгээр сард хөтөлсөн талархал. Зураг бүр дээр дараад ороход миний тухайн өдөр юунд талархсан нь байх жишээний.

Өвдсөн бол эдгэнэ гэж бод
Мөрөөдсөн ажилдаа орохыг хүсвэл би чадна гэж бод
Мөнгө дутсан бол мөнгөтэй болно гэж бод


Сэтгэлдээ бодоод зогсох биш түүнийхээ төлөө чадал, бололцооныхоо хэрээр зүтгэ. Жишээ нь:

Эрүүлжихийн тулд дасгал хий, эрүүл хоолло
Ажилтай болохын тулд хүнтэй холбогд, ажлын сураг байна уу лавла
Байгаа мөнгөө хэрхэн хэмнэхээ бод. 3 гуталтай бол 4 дэхийг авахдаа бод. Гаднаас кофе авч уухын оронд гэртээ буцалгаад уу


Бүдэрнэ ээ гэдэг чинь гүйж л явсан хэрэг шүү дээ. Босоорой. Өвдгөө гөвөөд урагшаа алхаарай.

Цаг нь болоогүй учралын төлөө цагаасаа эрт шаналах хэрэггүй