Шар айрагны найзтай байх уу? Сэтгэлийн найз илүү чухал уу?

Найз гэдэг их өргөн хүрээтэй үг. Ажлын найз, багын найз, гэр бүлийн найз, оюутны найз гээд бичээд байвал дуусахгүй.

Хүн бүр найз гэдгийг өөрийнхөөрөө ойлгож тэр сэтгэхүйгээрээ ханддаг аж.

Жишээ нь миний хувьд сэтгэлийн найзаа гэж бодож явсан хүнд би зөвхөн стресс тайлагч шар айрагны найз байх жишээний.

Эсрэгээрээ би дотны найзаа гэж бодож яваагүй хүн намайг сэтгэлийн найзаа гэж үнэлж дүгнэж явдаг байх нь ч бий.

Энэ бол хүний амьдралд тохиолддог л зүйлс. Магадгүй дөнгөж хорь хүрч явсан бол арай ч дээ миний найзаа гэж олон жил бодож явсан хүн ийм ч бододтой явах гэж ирээд л сэтгэл санаагаар унаж, уйлж унжих байх.

Одоо гучийн бөгс рүү орж яваа бид найз хүүхнүүдийн асуудлаас болж гутарна гэдэг юу л бол.

Аливаа харилцаа (хосууд, найз нөхөд, дарга цэрэг, хүүхэд эцэг эх, хөрш гээд бүх төрлийн харилцаа)  харилцан ярихгүйгээр, нэг нэгнийгээ ойлголцохгүйгээр оршин тогтнохгүй. Түүнийг дагаад харилцаагаа хүндлэх ч хэрэгтэй. 

Гэхдээ бусдыг хүндэлж байна гээд дургүй , хүсээгүй, сэтгэлийн ханамж авахгүй харилцаанд оролцсоноор тухайн харилцаа бүр байхгүйд хүрдэг. 

Эхнэр нөхөр салдаг, эгч дүүс муудалцдаг, найз нөхөд "дайснууд" болж хувирдаг, хадам бэр, хүргэнүүдийн хооронд хагарал үүсч хоорондоо огт харилцахгүй байдалд ордог. 

Эдгээр харилцааг эрүүл байлгаж, баттай үргэлжүүлэх гол хөдөлгүүр нь харилцаа өөрөө.

 Өөрөөр хэлбэл нэгнийгээ тэвчээртэй сонсдог, өөрийгөө тайлбарладаг, бусдыгаа ойлгох гэж хичээдэг, нэгэндээ хэрэгтэй үед нь завсарлага өгдөг, уучилдаг байх хэрэгтэй гэж би боддог. 

Мэдээж хүн бүр өөр, тэдний амьдрал ондоо, амьдрал болоод нийгмийг үзэх бодол ижилгүй, тиймээс амьралд юу чухал, ямар харилцаа дээгүүрт орох гээд бүх зүйл нь бас өөр байж таарна аа даа? Аяндаа амьдрал үргэлжилж нэгэн цагт ижилдүү, ойролцоо байсан амьдралууд өөр өөрийн өнгө аястай болж байдал өөрчлөгдөнө.

Зарим өөрчлөлт түр зуурынх, зарим нь магадгүй тэрхүү харилцаанаас бүр гарахаар ч болсон байж мэднэ. Тэглээ гээд зууралдаад байх нь утгагүй. 

Яс цусаар холбогдсон гэр бүлийн хүрээнийхэн, ёстой нөгөө уруул дордойвч элэг дордойхгүй тул хэзээ нэгэн цагт харилцаагаа сайжруулах нь тодорхой. Харилцаан дээрээ ажиллах хэрэгтэй. Эсвэл цаг хугацаа цаанаас нь зохицуулаад өгөх ч тохиолдол бий. 

Харин найз нөхдийн хувь бол арай өөр. Жинхэнэ сайн найзууд бол харилцаанд таарсан шуургыг туулаад гарчихсан л байдаг. Зарим нэг найзууд ой санамжаас ор сураггүй болчихсон л байдаг. Энэ бол нэг их яана аа, яасан аймаар юм бэ? гэх асуудал биш. "Ит из окей" 

Би угаасаа архи дарс ихээр хэрэглэж чаддаггүй болоод ч тэр үү  шар айрагны найзаас илүү сэтгэлийн найзтай байхыг чухалчилдаг.

Баяр жаргалтай үеэс илүү гунигтай, бүүдгэр өдрүүдэд сэтгэлээ нээн ярицах найзуудтай байхыг хүсдэг. Мөн тэднийгээ амьдралын галзуу хулганаар давхих үед гараас нь чанга атгахыг хичээнэ.

Дотоод сэтгэл, амьдралын бүдрээ нугачаагаа харилцан ярилцахгүйгээр хэрхэн жинхэнэ найз охид байхыг би мэдэхгүй, сурахыг ч хүсэх бодолгүй.

Найз нөхөд хүний амьдралд орж гарч л байдаг.

Тэртэээ тэргүй ижил бодол, сэтгэхүйтэй найзууд нэгнээ түшин, тэдний харилцаа он цагийн урсгалд улам батжиж гэр бүлээс дутахгүй хүчтэй нөхөрлөл үргэлжилдэгт би итгэдэг. 

Хичнээн удаа уулзаж, хэдэн аяга шар айраг хувааж уусан,  хэр  алсад амьдардгаас үл хамааралтайгаар шүү дээ.

Бороотой мөрөөдөл

Ангаж цангасан газар дэлхийг услахаар бороо айлчилж ирсэнийг өглөө хараад сэтгэл сэргэж, баяр төрөөд сайхан гэж...

Миний төрсөн  газрын баримжаагаар бол энэ намрын сүүлчийн бороо байх ёстой. Харин миний амьдралаа зохиосон газрын энэ жилийн анхны бороо юм уу даа?

Бороо хуучин бүхнийг угааж шинэ бүхнийг тэтгэх эхлэл.

Баярын улирал, бороо ороод ирэхтэй зэрэг шинэ оны тухай мөрөөдөл сэргэж, амьдрал бас услагдаж ургах бэлтгэлээ хийх мэт сэтгэгдэл төрдөг.

Өөрийн эрхгүй түрүү жилийн өдийд би, бид, амьдрал, ажил ямар байлаа гэж эргэн дурсдаг. Амьдралын давалгаа жам ёсоороо дээш, доошоо долгилсон байх ч юутай хүмүүн гэдэг утгаараа нэг жилийн дараа нэг шат дээшилсэн байх нь сайхан.

Дээшилсэн гэдэгт мэдээж нэмэгдсэн гутал, хувцас, шинэчлэгдсэн тавилга орохгүй л дээ.

Нэг зүйлийг ойлгон, ухаарч, ганц хүнд тусалж, ажлаас юм сурч авсан, хэрэггүй харилцаанаас ангижарч, шинэ найзтай болсон, хол ойр аялж, соргог юм үзэж, нүд тайлсан гээд ахиц гарсан байх. Бодоод үзээрэй. 

Мэдээж ямар ч алдаагүй, огт бүдрэхгүй амьдарна гэж юу байхав. Алдаагаа давтсан ч үргэлжүүлээд хичээгээд байвал болох нь тэр. 

Харин шинэ ондоо заавал хийх болон, байх жагсаалтаа эртнээс гаргахыг зөвлөж байна. 

Нөгөө 20 давхарын хэмжээнд мөрөөдөж 19 давхартаа хүрнэ гэдгээр мөрөөдлөө дахин нэг эргэцүүлж, үргэлжлүүлэн мөрөөдөөд байгаарай. 

Борооноор мөрөөдөх ч бүр сайхан шүү! 

Холбоотой бичлэгүүд 

ЭНД ДАРААРАЙ 

ЭНД ДАРААРАЙ

Намар төсөл

Сүүлийн хэдэн жил хүмүүст ажил олж өгөх, ярилцлаганд бэлтгэх маягийн зүйлсийг бага багаар хобби болгон хийсээр ирсэнийг зарим хүн мэдэх байх. Хобби урчаас нэг долларын ч орлого олоогүй.

Харин ажил мэргэжлээ сольсон нь тэрхүү хоббигоо мөнгө олдог болгох зорилготой холбоотой байлаа. Би карерь гэж хэлэхээс аль болох зайлсхийдэг. Учир нь би тэр хэмжээний албан тушаалтай ч биш, тийм хэмжээний мөнгө ч олдоггүй. Карерь хийх миний мөрөөдөл ч биш. Амьдрал бололцоо олговол дуртай ажлаа хийж, хамт олонтой байх сайхан. Мэдээж амьдралын байдлаас болоод гэртээ суудаг ээж болвол надад бас л сайхан.

Төрсөн өдрийн сараа тохиолдуулан хүн болж төрсөний хувьд ямар нэг зүйл хийхээр "Намар" төслийг төлөвлөсөн юм. Хэдийгээр нэлээн хэдэн том жижиг зүйл миний бяцхан төсөлд багтсан ч бүгд санааны зоргоор бүтсэнгүй. Юутай ч их бага хэмжээгээр цөөхөн хэдэн хүнийг баярлуулсан гэж ойлгож байгаа.

Гэхдээ нэг хүний амьдралыг бол өөрчилөхөд тусалж чадсан шүү!

Хэн нэгний амьдралыг орвонгоор нь өөрчлөх чадалтай байхын сайхныг сэтгэлдээ төсөөлж явсанаас чухам ямархуу мэдрэмж төрдөгийг энэ мөчид л мэдлээ.


Өчигдөр утсанд маань хэд хэдэн мэссэж дараалан ирж байна. Ид ажлын дундуур байсан тул нүднийхээ үзүүрээр гүйлгэн хартал хүүхдийн сургууль, нөхөр, эмч нарын нэгнээс биш байсан тул яаралтай биш байна гэж ойлгон ажилдаа улайрсаар өдөр өнгөрчээ.

Ажлаа тараад машинруугаа алхах зуураа утсаа шалгаж амжив.

Манай хүүхдийн найз охины ээжээс баахан баярласан, талархсан мэссэж, есөн шидийн партины анимешион (монголоор юу гэхийг ёстой бүү мэд)  завтай болохоороо залгаарай гэснээр төгсөж.

"Намар" төслийнхөө хүрээнд хоббиныхоо дагуу өөр шигээ гадаад орноос цагаачилж ирсэн жирийн нэг эмэгтэйд туслах зорилгоор түүнийг шинэ ажилд ороход нь coach ( зөвлөгөө өгч мөн үү?) хийж, ажлын ярилцлаганд бэлтгэж, туршлага сонирхол, skill set (чадварыг багц мөн үү?) - гэх мэтэд нь тохирсон ажлын байр олж өгсөн юм.

Хэдийгээр би резүмэ (CV)-ээг нь шинэчилж, ярилцлаганд бэлдүүлсэн ч тэр хүн өөрөө их хичээсэн. Миний зөвлөгөөг анхааралтай чагнаж, үг бүрийг тэмдэглэн авч байсан. Намайг сонсож ярилцлагандаа уйгагүй бэлдсэн.

Би өмнө нь олон хүмүүст зөвлөгөө өгч байсан ч яг энэ бүсгүй шиг тууштай хичээж, хүсэж буй ажлынхаа араас явсан нь цөөн.

Украйн бүсгүйг Нина гэж нэрлэе.

Нинатай анх танилцаж бага багаар мэддэг болох тусам миний арван жилийн өмнөх амьдралыг дэндүү их санагдуулдаг байв. Өөр шигээ урт зам битгий туулаасай гэсэндээ би хэрхэн туслахаа олж яддаг байсан юм.

Нина өчигдөрхөн машин зардаг хүн байсан бол өнөөдөр мөрөөдлийн компанидаа өмнө нь эх орондоо хийж байсан ажилдаа зөвхөн гуравхан жил энд цагаачилсаныхаа дараа орж чаджээ.

Маш их баярлалаа гэж орос англиар урсгах , бас мэгших эмэгтэй хүний, ээж хүний дуу утасны цаанаас дуулдана. Би арай л дагаад мэгшсэнгүй ...

Нинагийн охины ирээдүй улам гэрэлтсэн гэдэгт эргэлзэх зүйл алга.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

Дараах зургийг харих замдаа улаан гэрэл дээр амжиж дарсан юм.


Үүлнээс ч хүртэл таашаал авч чаддаг өндөр мэдрэмж бас байнаа байна гээд л онгирчихоё доо
 😏

Амьдрал сайхан сайхан биш гэж үү?

Машины цонх халтар байжээ. Уучлаарай :)