Хошин шог буюу болсон явдал

Хагас бүтэн сайныг Баасан гарагийн оройтой хамт тэсэн ядаан хүлээнэ дээ. Учир нь гэр бүлээрээ ямар нэгэн адал авдал зохиож, үгүй гэхэд хамтдаа агаар салхинд зугаална. Бүр болохгүй бол гадагшаа гарч ямар нэг орны амталж үзээгүй хоол иднэ. Бороо устай, лагшин эс тунгалаг бол дор хаяж хоол захиалан авчруулж гахай болтлоо гүзээлцгээж хөлөө жийн юу ч хийхгүй кино үзэх дуртай хүмүүс. 

Хувцасаа эвхэж, мөнгөө хэмнэхдээ маруухан улсын тоонд нөхөр бид хоёр яалт ч үгүй орно. Харин охинтой болсоны ачаар хүүхэддээ муу үлгэр дууриал үзүүлэхгүйн тулд хувцас хунараа эвхэж, тоосоо өдөр бүр соруулдаг мундаг улс болоод байгаа. Хүүхдээ хүмүүжүүлэхээс илүү хүүхэд өөрөө бид хоёрыг хөөрхөн хүмүүжилтэй болгох юм. 

Би Солонгосоос ирээд удаагүй байлаа. Алдарт Гангнам дүүргээс дурлан байж авсан сул загвартай хар өнгийн шарваараа өмсөж гайхуулахыг тэсэн ядан хүлээсээр ашгүй хагас сайны өглөө боллоо. Орой нь бэлдэж тавиад хоносон өмдөө өглөө яаран углаж ""би бэлэн, явцгаая" гэж нөхөр охиноо яаруулав. Төв цэцэрлэгт хүрээлэнд хэдийн хүмүүс иржээ. Амралтын өдөр болохоор хүүхэд асрагчаас илүүтэй эцэг эхчүүд давамгайлсан нь андашгүй. 

Үргэлж л намайг хөөрхөн байна, гоё харагдаж байна гэдэг нөхөр маань энэ удаа чимээгүй. Би дотроо шинэ өмдөө магтуулах санаатай өмнүүр хойгуур нь нэлээн явлаа бас л дуугүй. 

Хортой нар гарахаас өмнө амжин охиноо ханатал тоглуулсан бид хоёр долоо хоногийн өмнө авгын урьсан ёсоор Сан Францискод өдрийн хоол идэхээр хөдлөв. Сая нэг юм ам нээж "чи яагаад миний унтлагын өмдийг өмсчихсөн юм бэ" гэх нь тэр. Би эхлээд тоглож байна гэж бодон инээтэл манай хүн ер тоглож буй шинжгүй их л гайхсан байртай байлаа. Угийн хэнэггүй, нарийн ширийнийг анзаараад байдаггүй нөхөр маань нээрээ намайг өөрийнхөө унтлагын өмдийг өмсөж гэж боджээ. 

Яг энэ яриа болох зуур бидний дэргэдүүр нүв нүцгэн дугай унасан ах зөрлөө. 

Гэртээ ирээд шөнө өмсөхөөсөө илүү гэртээ өмсдөг унтлагын өмдийг нь үзвэл нээрээ нэлээд ижилхэн материалтай, шуугаад өмсвөл миний үнэтэй Гангнамын өмднөөс ялгархааргүй юм гээч ... 

Нөхрийн унтлагын өмдтэй байтугай нүцгэн явж байсан ч хамаагүй Сан Франциско ... 

Шөнийн болзоо буюу эротикийн үргэлжлэл

... мөрөн дээр зөөлөн үнссээр сэрээлээ... бүдэгхэн сарны гэрэл дутуу хаасан хөшгөөр шагайхыг бодоход үүр арай цайгаагүй бололтой. Бодлоос нь гарахаа больсон дурлалт ханхүү бүсгүйг үргэлжлүүлэн үнссээр сэрэл өдөөж орхив. 

Өөдөөс нь эргэн харах гэсэн боловч хэрэггүй хэмээгээд буцаан цааш харуулж гараараа бэлхүүсээр тэврэн бүсгүйн биеийг улам өөртөө наан ойртуулахад ер бусын халуун эд биеийг нь төөнөж биеэ эзэмдүүлэх адын хүслийг төрүүлэх нь тэр.

Эр хүний ид хаваа гайхуулах гэсэн мэт "чи үүнийг л хүсээ юу" хэмээн хатуурсан эрхтэнээ араас хүчтэйхэн бүлэв. Бүсгүйн нуруу хотосхийн зөөлөн ёолж залуугийн хэмнэлийг даган бөгсөө хөдөлгөж эхлэв ээ. 

Бүсгүйг давуулан тэвэрсэн гар доошилж яг л хүслийг нь уншсан мэт хүргэхийг хүсэж байсан газар очиж хуруугаараа оролдоход өөрийн мэдэлгүй бүсгүйн гийнах дуу улам чангарчээ. 

Залуу аль болох удаанаар цэнгүүлэх гэсэн мэт аажмаар буцаан татах хэрнээ хүчтэйгээр эргүүлэн бүлнэ. Тэр бүрий бүсгүй дуу алдан чичирч өчигдөр өглөөнөөс хойш өндийлгүй загас наадуулсан орны эхүүн боловч тансаг үнэрт мансууран үүрд түүнтэй янаглах шуналд дийлдэнэ. 

Хэсэг хугацааны дараа залуугийн хөдөлгөөн шал пал хийх чимээний хамт хурдасч гараараа эрхтэнээ сугалахыг завдахад бүсгүй болиулж дотор нь тавь, битгий ав, дахиад ганц удаа хүчтэй хэмээн ээрч муурсанаа ямар сайхан юм бэ гэж дуу алдах агшинд залуугийн бие сулран үл ялиг гэдийсэн ч залуу насны омогшил болсон түүний чалх сайтай бэлэг эрхтэн гозойсон хэвээр бүсгүйн нууц ертөнцөд оршсоор байлаа ...

"Лойцон" Филиппинүүд буюу стеротайп

Эрт сэрвэл нэгийг сонсож, орой унтвал нэгийг дуулдаг гэгчээр оройн нойроо харамлалгүй найз нартайгаа уулзсан минь болжээ. Бид стеротайпын талаар нэлээд ярилцлаа. Харамсалтай нь бид хэд энэ үгийг ойлгомжтойгоор орчуулах мэдлэг дутав. Гүүгл орчуулагчаар хайвал "урьдач" гэж гарч ирэх юм. Байж болох ч нарийн утгыг нь бүрэн илэрхийлж чадахгүй мэт санагдан гүүгл орчуулагчийг голох бардам сэтгэл илрээдхэв. Өөрөө орчуулж чадахгүй хэрнээ мундаг гүүгл гуайг голоод болж байгаа ч юм уу үгүй ч юм уу хэн мэдлээ. 

Орос хэл сайтай хүмүүс бол стеротип гэдгийг ойлгон аятайхан орчуулчих байх. 

Ази хүмүүс будаанд дуртай, ази жолооч нар машин муу барьдаг, америк хүмүүс шуналгүй, эмэгтэй хүмүүс уйланхай гэх мэт нэг ерөнхийгөөр дүгнэгдсэн нэлээд хэсэг хүмүүсийг л стеротайп гээд байгаа юм. Өөрөөр хэлбэл тогтсон нэгэн хэв маяг гэх үү дээ. 

Станфорд эмнэлэгийн оройн ээлжнийхэн ихэвчлэн Филиппин хүмүүс байдаг гэнэ. Учир нь мэдэл бүхий нэгэн менежер Филиппин хүн аж. Миний ажигласанаар тэд хаа газар нэг нэгнээ татаж ажилд оруулахдаа гарамгай үндэстэн. 

Манай найзыг оройн ээлжинд ажиллах уу гэсэн хүсэлт иржээ. Хамгийн анх зурасхийн орж ирсэн бодол нь бөөн Филиппинүүд бий гэж бодсон ч найз маань саналыг хүлээн авчээ. Яахав энд ерөнхийдөө Филиппинүүд ховонд дуртай хүмүүс гэсэн стеротайптай болохоор манай найзын санаанд тэгэж орж ирсэн хэрэг. Түүнээс биш бидний хэн хэн нь арьс өнгөөр ялгаварлан гадуурхах үзэлгүй хүмүүс шүү. Ээ бурхан минь, буруугаар ойлгож цаашаа цуурав. 

Филиппинчүүдтэй хамт ажиллаж эхлэхэд нээрээ л бүгд явах, ярих, зүс царай хүртэл нэг хэв маягийн ижил төстэй харагджээ. Харин хүн бүртэй үг сольж, илүү мэдэхийн хэрээр бүгд өөр өөр үзэл бодолтой, бие биенээсээ тэс ондоо болохыг мэдсэн гэдэг. 

Үүнтэй адил бид хүнийг өнөөдөр ямар байгаагаар нь ойлгож хүлээн авах гээд байдаг. Гэтэл тэр хүний амьдралд юу ч тохиолдсон байж болно, ямар ч замаар өнөөдрийг хүртэл явж ирсэн байж болно. Өнөөдөр даруухан царайлаад, намба суусан ээж өмнө нь гал халуун залуу насыг наргиж цэнгэж, дуулж хуурдаж, сурч мэргэшиж өнгөрүүлсэн ч байж мэднэ.

Өнөөдөр чимээгүйхэн нас нь өндөрлөг өөд өгсөж яваа нэгэн хийх юмаа хийж, бүтээх юмаа бүтээж,  гялалзах үедээ гялалзаж явсаныг мартдаг. 

Манай монголчууд Хятад хүмүүст дургүй байдаг нь үнэн. Оюутан байхдаа "Цусгүй дайн" нэртэй Хятадуудыг муулсан нийтлэл бичиж явсан хүний нэг нь би өөрөө. 

Сүүлийн хэдэн жилд Хятад хүмүүсийн талаарх бодол эрс өөрчлөгдлөө. Би өмнө нь Хятад хүн гэдгийг нэгэн хүн мэтээр ойлгож Хятад хүн бүр муу муухай санаатай хэмээн ташаа ойлгож явжээ. 

Нэлээд хэдэн Хятад хүнтэй бизнес болон дотно андын хэмжээнд хүртэл танилцаж, нөхөрлөж явна. Хүний сайхан чанар болоод сэтгэлийг тэдгээр хүмүүсээс мэдэрч авлаа. Ингэж бичлээ гээд "энэ аягүй бол өөрөө Хятад цустай байх аа" хэмээн намайг муулахын оронд миний хэлэх санааг ухаж ойлгон, хэн нэгнийг зөвхөн номны хавтас шиг хараад өнгөрөх биш дотор талын хуудас бүрийг нь уншдаг байгаасай гэж хүсэх гэсэн юм. 

Хүний амьдралд шинэ найз, амраг гээд амьдралын хуудас бүрийг нь мэдэхгүй хүмүүс орсоор гарсаар байдаг. Хэрэв тэр хүнийг амьдралдаа хадгалахаар шийдсэн бол илүү мэдэж, танихын тулд илэн далангүй ярилцаж, цаг зориулан гаргаж, хамгийн гол нь өөрийнхөө амьдралын бүлгээс ярьж өгч номын хуудсаа харамгүй дэлгээрэй. 

Хэдэн хувийн аз жаргалтай төрсөн бэ?

Энэ хүн ер нь гуниглаж үзсэн болов уу гэж эргэлзмээр үргэлж инээд алдсан, цаанаасаа аз жаргал "үнэртсэн" хүнтэй таарч байсан уу? Баясал нүүрнээс нь салдаггүй, юу ч тохиолдсон даваад гарах сэтгэлийн тэнхээтэй тэр хүн 70 магадгүй бүр 99,5 хувийн "happiness" буюу аз жаргалтай эхээс төрсөн болж таарлаа. 

Би төрөх өдрөө хүлээн догдолж байсан тэр өдрүүдэд зурагт, дэлгэцийн хэрэгцээгээ тодорхой хэмжээгээр хязгаарлаж байсан ч хүн төрөх, хүүхэд бойжуулах, ээж болохтой холбоотой шинжлэх ухааны баримтат кинонуудыг шимтэн үзсэн билээ. 

Эгч, найз, ажлын газрын охин гээд дотны болон энгийн танил хүмүүс энд тэнд жирэмсэн боллоо гэдгийг сонсоод нэгэн шинэ хүн мэндлэх нь дээ гэж хөнгөн бодож өнгөрсөнөөс цааш гүнзгийрүүлэн эргэцүүлж явсангүй. 

Харин миний хамрын дор өдрөөс өдөрт томрох гэдсээ харж, биен дотор минь амьд амьтан хөдлөхийг мэдрэн, хорвоод мэндлэх гэж яаран гүйгээд амьсгаадсан мэт хурдан галт тэрэгний хэмнэлт бүхий зүрхний цохилтыг чагнах бүр ямархан гайхамшиг миний дотор бүрдэж буйг сониучирхан биширч, бяцхан хэрнээ агуу ертөнцийн талаар улам  ихийг судалж мэдэх хүсэл минь төрж билээ. 

Өмнө нь сонсоогүй олон сайхан мэдлэг хураасан дотроос хамгийн ихээр сэтгэлд хоногшин үлдэж сонирхолыг минь татсан нэгэн мэдээлэл бол "хүн төрөхдөө тодорхой хэмжээний аз жаргалтай төрдөг" гэсэн явдал байв. Тухайн хүн хэдэн хувийн аз жаргалтай төрөхийг ёстой хөх мөнх тэнгэр, хөрст алтан дэлхий шийддэг байх. Үлдсэн хувь амьдралаас шалтгаалж, эсвэл хүн өөрийнхөө сэтгэлийн хөдлөл, оюун ухаанаар зохицуулна. 

Магадгүй хайраар даллан ирж, гэдсэнд ургах үрээ олдсон цагаас нь энхрийлэн, амар тайван орчинг бүрдүүлвэл тэрхүү аз жаргалын хэмжээ нь нэмэгдэж төрөх ч юм билүү хэн мэдлээ.

Туршлагатай ээжүүд, эмч, эрдэмтэд гэдсэнд байхад нь хүүхэдтэйгээ ярьж, сонгодог хөгжим сонсгох хэрэгтэй гэж зөвлөдөг ч нарийн учиртай биз ээ. 

Эрчүүд та нар яахаараа ?

Эрчүүд та нар яахаараа сайхан үгээ харамлаж, сэтгэлээ илэрхийлэхээс айдаг хүмүүс вэ? Бүсгүй хүн гэдэг үгээр тэтгэгдэж, халамжаас шим авдаг гоёхон бөгөөд эмзэгхэн цэцэг гэдгийг мартаа юу?

Хүсэлд чинь оршиж, зүрхэнд чинь хайрлагдаж, бодолд чинь уяатай бол гаргаж түүнийгээ олон удаа хэлж болохгүй юу? Эмэгтэй хүн улам уярч, илүү зөөлөрдгийг мэдэхээс, цаашаа эргэн сэтгэлээ буруулсан түүхийг би сонсоогүй. 

Эрчүүд та нар харин эсрэгээрээ сэтгэлээ дэлгэж, зүрхээ уудлах бүр зүг буруулан шинэ рүү тэмүүлдэг сониуч нөхөд. Хайраа нууж тэвчих тусам надад татагддаг соронз. 

Эрчүүд та нар яахаараа олон цэцэг хатааж бас дэлгэрүүлдэг юм бэ? Та нар үнэндээ цэцгийн тоосоор амьсгалж, балыг нь цуглуулдаг зөгий биш үү? 

Би бууж өглөө. Учир нь цэцэг бүхэн зөгийнд ээрэгдэх гэж ургадаг ч юм уу. Зөөгийнд ээрэгдсэн цэцэг бүхэн үзэсгэлэнтэй агаад хорвоогийн бүх цэцэгсийг зөгий хайж олдог.

Зөгий цэцэггүйгээр амьдарч чадах уу ингэхэд?

Өөртөө ажил зохиож явдаг хүмүүс

Надад нэг гал найз бүсгүй бий... Түүнийг анх би богинохоооон цэнхэр бараан өнгийн юпкаг пиджактай хослуулан өмсч, шагайгаа ороосон үдээстэй тухайн үедээ ховорт орох гоё хар өндөр өсгийттэй, нүдний шилтэй, хавтас бичиг барьснаар харж билээ. Яасан сайхан тэгшхэн хөлтэй, их зантай, ихэмсэг хүүхэн бэ гэсэн анхны сэтгэгдэлээр  угтсан агаад өнөөдөр ижилдэн дассан, итгэлтэй үнэнч найзууд болно чинээ санаанд яахин орно. 

Бусад найзуудаас ялгарах онцлог гэвэл хэдэн насаар эгчмэд болоод ч тэр үү угийн хүн сайтай шударга зантай болоод ч тэр үү, аль эсвэл аль алинаас нь болоод ч тэр үү миний амьдралд хэрэгтэй нүдээ олсон үгсийг час хийтэл цаг мөчийг нь тааруулж байгаад хэлж өгнө. 

Түүний үгийг сонсож дагаад надад буруутсан удаа үгүй. Цаашдаа ч би сонсоно. Учир нь тэр үргэлж надаас түрүүлэн амьдралын замаар алхаж надад нүх байвал тойрон гарахыг сануулж, хаагуур хэрхэн юугаар явбал амьдралын зам илүү дардан, бэрхшээл багатайг эргэж харан надад хэлнэ, сануулна. 

Найз маань монголын анхны хамгийн залуу эмэгтэй сэтгүүл зүйн ухааны доктор. 28 насандаа энэхүү эрхэм цолыг хүртэж би магадгүй хамгийн залуу зочноор цайллаганд нь уригдаж очсон саяхан мэт. Дайчин, хөдөлмөрч, эрдэмтэй орчин үеийн ганган хүүхэн. Аль алийг нь амжуулж яваа сийрэг толгойтой сайхан бүсгүй. 

Өөрийнх нь хэлсэнээр өөртөө ажил зохиож явдаг хүмүүсийн хоёр нь бид хоёр. Гэртээ зүгээр сууж,  ажил дээрээ дэмий цаг өнгөрөөж чаддаггүй хүмүүс. Дэлгүүр хамт хэсэнгээ гуя хасаа толинд хослуулан харж айлгүйтэх ч цаг байна, ширээний ард нухацтай суун эрдэм шинжилгээний ажил бичилцэн суух ч үе байна. 

Амьдрал тогтворжин дутах юмаар ховор болоод ирэхийн цагт яаж ийж байгаад хийх ажил олчихсон л сууна. Намайг зогсонги болоод ирэхийг амдан алив ингэе тэгэе, сэтгэе бодоё гэж намайг өөртөө ажил зохиохоос өөрцгүй байдалд аваачих нь сайхан. 

Амьдралд хааяа өөрөөсөө ч нуумаар асуудал гарахад асуугаагүй байхад мэдэрч хариулдаг миний эгчмэд найз. 

Охидууд эгчмэд, хөвгүүд ахмад буюу өөрөөсөө ах найзтай байх хэрэгтэй шүү. Байхгүй нэгэн нь олж аваад, байгаа нэгэн нь баярлаж яваарай. 

Төвдөд мод эзэмшдэг баян хүн шүү би

Баяраар, охины төрсөн өдрөөр манай шуудангийн хайрцаг үргэлж дүүрч, гадаа цаасан хайрцагнуудын цуваа үүсдэг. Нөгөө эрэгт амьдардаг үеэл эгч, Чикагод амьдардаг найз охиноос ихэвчлэн том хайрцаг ирнэ.

Манай гэрийнхнээс бол баяр болсон ч бай үгүй ч бай, хэрэггүй гэж хэлсэн ч хамаагүй илгээмж үргэлж ирээстэй.  

Монголоос найзууд юу захих уу гэж үг солих бүрт асууна. Би мөн азтай хүн шүү. Өчигдөр найз маань юу явуулах вэ? Жонд дэмий юм явуулж байснаас хэрэгтэй зүйлийг нь явуулах гэсэн юм гэлээ. Би хариуд нь "бид бэлэг өгдөг ч үгүй, бэлэг авдаг ч үгүй шүү дээ. Ил захидал л өгдөг, чамайг ирээд буцахаар "открит" өгөөл явуулна даа" гэж бөөн инээдэм болов. 

Монголчууд бид үнэхээр сэтгэлээсээ том бэлэг өгөх дуртай хүмүүс. Хэдийгээр энд чамгүй олон жил амьдарч соёл заншлаас нь суралцаж байгаа ч хүнд "том" бэлэг өгөх монгол зангаа бүрэн хаяж чадахгүй л явна. 

Манай хадмууд бидний төрсөн өдөр, баярууд, хуримын ой гээд бүх тэмдэглэлт өдрүүдийг жижиг томоор алгасахгүй үргэлж мэндчилгээ илгээнэ. Зүгээр л энгийн ил захидал. Харин миний талаас үе үе том баяраар том том бэлэгнүүд ирнэ. Эхэндээ манай нөхөр гайхдаг байлаа. 

Бид хоёр гэрлээд удаагүй байсан юм даг. Хадам ээжээс ирсэн анхны илгээмжүүдийн нэг байлаа. Би юу байгаа бол гэж догдлон нөхрөө хайрцаг задлахыг жоохон хүүхэд шиг тэсэн ядан хүлээн, гарынх нь хөдөлгөөнийг дагуулан харж суув. 

Ном, зураг, ууттай чихэр ... том нимгэн дугтуй гараад ирлээ. Би дотроо янз бүрийн өв залгамжлах тухай чухал бичиг юм уу, бонд хувьцаа юм уу гэж хэдэн янзаар бодож амжих нь ойлгомжтой. 

За ер нь хувьцааны бичиг гэж андуурмаар сертификат ажээ. Төвдийн өндөр уулсын нэгэнд нөхөр бид хоёрын нэр дээр мод тарьж, мөнгө нь тусламжийн байгууллагат шилжсэнийг цохон тэмдэглэсэн байв.

 

Хүслийн бороо буюу бас нэгэн эротик бичих гэж оролдов

Хүслийн оргилон болсон хоёр бие нүүр тулан уулзах догдлом мөч иржээ. Хурууны үзүүр, харцны мөргөлдөөнөөс жирэлзэн үүсэх шохоорхолын соронзон биеэр тархан ангаж цангасан уруул хоорондоо шүргэлцэх төдий хүлээлтийн бөөн үүлнээс хүслийн бороо юу юугүй асгарлаа.

Удаан хугацаанд, зөвхөн дотоод ертөнцдөө төсөөлөн мөрөөдөж явсан бүсгүйнхээ нүцгэн биенд хүрэлцэх нэн таатай. Торго шиг зөөлөн арьстай туяхан биеийг энхрийлэнхэн зөөлнөөр ахин давтан үнсээд ханашгүй. 

Түүний хөдөлгөөн бүрийг анхааралтай ажих нь бүсгүйн хувьд амтат уруул, ухаалаг дүр төрхнөөс эхлээд нуруу, цээж, гар, хөл гээд олон уулзаж чадахгүй дурлалт залуугийн гэсэн бүхнийг сайтар тогтоож авах гэсэн мэт. 

Олон сар жилээр утасны цаанаас сонссон дуу хоолой, мессежеер дамжин ирсэн биесийнхээ үгэнд хэдий дассан ч орон дээр зэрэгцэн хэвтэхэд, дөнгөж танилцсан хоёр хүсэл тачаалдаа согтон нүгэл үйлдсэн мэт ичингүйрэх сэтгэл хоёуланд нь төрнө.

Төд удалгүй залуугийн эрхтэн хөвчрөн чангарч дахин загас наадуулан цэнгэхэд бэлэн болжээ. Энгэртээ наалдсан бүсгүйн үсийг үнэрлэхээс эхэлж дух, нүд, хацар, уруулыг үргэлжлүүлэн үнсэн таалж, хүзүүгээ үнсүүлэх дуртай гэснийг санасандаа юу аль эсвэл хэтэрхий тэчяадсандаа тэр үү шуналтайгаар чи минийх гэж тамгалах мэт шимсээр. 

Бүсгүйн ичэнгүйрсэн сэтгэл хормын зуур дахин галзуу секс хийх хүслээр солигдож залуугийн шимэлтээс мултран өөрийнх нь хүзүү өөд ноцож хариу тамгалах гэсэн шиг залуугаас дутахгүй хүчтэйгээр шимж ханаад, уруулыг нь озон хэдийн бэлэн болж гозойсон эрхтэнээс атган авч өөрөө чиглүүлэн амсардуулангаа морин дээр сурамгай мордох мэт дээр нь гарч дээш доошоо оволзон хөдлөхөд хоёр хөх нь савлан хөдлөнө. 

Залуу хэсэг ухаан алдах мэт нүдээ хагас анин аахилж байснаа хоёр гараараа савлах хөхийг базлан хөхний товчийг нь имрэв. Хэсэг хугацааны дараа амьсгал нь дахин дээрдсэнээ бүсгүйн өгзөгнөөс базан авч дэм өгөн хөдөлгөөн улам хурдсав. 

Зэрэг дуу авалцан дур ханаж бүсгүй түүний хөлөрсөн биен дээр гулсан унахад залуу эвтэйхнээр хажуу тийш нь болгон араас нь чангаас чанга тэврэн мөрийг нь зөөлхөн үнссээр... 

Томоос том, ахин дахин хүссэн уучлалт

Хүн хамгийн дотнын, хайртай, итгэлтэй хүндээ ааш гаргаж, муухай үг хэлдэг гэвэл надтай санал нийлэх хүн байна уу? 

Ертөнц дээрх хамгийн сайн найзаа би нээрээ зовоож байна аа. Уурласан уур, бухимдсан сэтгэл гээд болохгүй бүхнээ найздаа гаргаж өчүүхэн зүйлд тунирхан найзыгаа гомдоох боллоо сүүлийн үед.

Би дархлагдсан амьтан, тахьсан шүтээн гэж өөрийгөө сэтгэсэндээ тэгсэн биш ээ. Өдөр өнгөрөх бүр чи бидний амьдрал өөрчлөгдөж өмнө нь үргэлж хамтдаа байсан чамайг өөрөөсөө холдоод байх шиг санагдаад байхаар хар аяндаа цухал минь төрөөд жижигхэн өөг ч андахаа байчихаад өлссөн өвлийн чоно шиг хэзээд асахад бэлэн болчихжээ би. 

Дараагийн жил хагас надад бүр илүү ховорхон олдохыг чинь гадарласан ч гэсэн жинхэнэ ухаандаа би чинь чамайгаа зорьсон өндөр оргилдоо хүрэх хариугүй дөхсөнийг хараад санаа минь амарч зүрх минь инээж байгаа шүү.

Анх би найзыгаа эмнэлгийн чиглэлээр сурахад дотроо дурамжхан байсан нь үнэн. Учир нь би өөрийнхөө нүдээр эзэмшсэн мэргэжилдээ ямар сайн, байгалиас заяасан ямар сайхан авъяастайг нь мэддэг болохоор тэс өөр салбарт тэгээс эхлэн зүтгэх сонголтынх нь өмнөөс шаналах өдөр ч байсан. Харин өнөөдөр найз маань хүн хичээгээд, тууштай тэмцэж чадвал юунд ч хүрэх бүрэн чадалтайг нотолж өглөө. Угийн потенциаль сайтай, математик сэтгэлгээ өндөртэй байдал тавиас илүү хувьд нь нөлөөлсөнийг ч шударга хэлнэ би.

АПУ-д "гал хам" маркетингийн менежер болгон намайг өлгийдөн авсан найздаа анх баярласан, мөрөөдлийн Америкт дуудан авчирч онгоцны буудал дээр баглаа цэцэгтэй тосч авахад бас баярласан, найзыгаа Станфордын клиникт ажилд ороход бүр их баярласан, хүсэж байсан хоёр төрлийн сургуулиас хоёулангаас нь санал авсан гэхэд найзынхаа өмнөөс хязгааргүй баярласан. 

Харин намайг байгаагаар минь хайрлаж, дотнын найзын ажлаас минь одоо болтол халаагүйд хамгийн их баярладаг. 

Найзуудын амьдралд өөрчлөлт ороход аяндаа зам нь бас салдаг юм шиг. Бүр мөсөн биш ч түрхэн хугацаанд нийлж явсан зам салаалан одоход эхэндээ хэцүү. Зөвхөн надад биш нөгөө найзад маань ч адилхан хэцүү байсныг харин би анзаараагүй явжээ. Түүний хувьд ч гэсэн би өөрчлөгдөж, миний зам ч түүнийхээс салаалан одсоныг мартжээ. 

Салаалсан зам эргээд нийлэх өдөр ирнэ. Тэр болтол зориуд амсхийн замаасаа гажаад ч болохноо хуучин замаараа хамтдаа алхах хэрэгтэйг ойлголоо. Эс тэгвээс амьдралд минь үнэгүй олдсон хэрнээ хамгийн үнэтэй чухлаас чухал найзаа алдаж мэдэх нь байна шүү. 

Уучлаарай. 

Ялгаатай ба Петр найз минь

Нэг хүүхэдтэй байтугай, огт хүүхэдгүй, огт хүүхэдгүй байтугай хэзээ ч гэрлэхгүй гэж шийдсэн хүмүүс энд байдаг. Хүүхэд, гэр бүлийн талаар Ази заншлаас арай өөр. Магадгүй нэлээд ялгаатай. Тэдний хүсэл, шийдвэрийг шүүмжлэх эрх хэнд ч байх ёсгүй. 

Манай нөхрийн найз Петр гэж залуу бий. 17 настайгаасаа гал командад ажиллаж, Давис (UC Davis) хэмээх улсын сайн сургуулийг төгссөн нэгэн. Хэдэн жилийн өмнө ахмад цол хүртэн одоо Сан Францискогийн нэгэн дүүргийн гал командын багийг ахлан ажилдаг. 

Гал команд, цагдаа гэх мэт хүчний байгууллага, сувилагч эмнэлгийн ажилтнууд энд баатарт тооцогддог. Тэр хэмжээгээрээ ч ажлаа үнэлүүлсэн өндөр цалин авна. 

Петр Сан Францискогийн аюулгүй, сайхан хороололд 3 өрөө тохилог байшинд ганц бие амьдарч Ангус нэртэй нохойдоо өөрийн хүү мэт хандана. Ангус манай охиныхоос үнэтэй тоглоомоор тоглож миний очдог салоноос үнэтэй газар үсээ засуулж, усанд оруулуулж ханш өндөр багшаар тусгай хичээл заалгуулна. Ангус чухам хэдэн настайг би хэлж мэдэхгүй юм. Би танилцаад 8 жил болж байгаа гэхээр 10 гарсан болов уу.  

Манай Петр хүнтэй сууж, хүүхэдтэй болохгүй гэсэн шийдвэртэй нэгэн. Найз охидыг нэг их олон солиод байхгүйг харахад, болохоос нь болохгүй хүртэл үнэнчээр үерхдэг бололтой. Найз охины хүүхдийг өөрийн мэт эрхлүүлэн хайрлах Петрийг хараад би өөрийн эрхгүй гайхах бас бахархах зэрэгцэнэ. Заримдаа Ангусыг байхгүй болоод өгөхөөр найз маань яана даа гэж  өөрийн эрхгүй Ази эмэгтэйн сэтгэлээр өрөвдөнө. 

Өөрийн санаа өөртөө зөв, хүний амьдралыг шүүмжлэх эрх надад байхгүй. Петр хэзээд бидний найз хэвээрээ л байх болно. 

Цонх хаагдвал хаалга нээгдэнэ

Хүний амьдралд хичнээн хичээсэн ч, олон жил хүссэн ч хүрч чадахгүй, авч чадахгүй зүйл гэж байх юм. 

Санаагаар унаж орондоо хэд хоног хэвтэх үү? Сэтгэлээр нэг мөсөн үхэж уйтгартай амьдрах уу ?

Хэн нэгэнд амархан олдох зүйл нөгөө нэгэнд яагаад ч олдохгүй мөрөөдөл болох нь хяслан гэдэг л байх даа. 

Ганцхан чамд ийм асуудал тохиолдож байгаа юм биш. Хаа нэг газар, хэн нэгэнд тохиолдолдож л байгаа. Чухам хэрхэн давж гаран маргаашийн амьдралаа яаж хэвийн үргэлжлүүлэх арга замууд өөр. 

Бүхэл бүтэн ертөнц түгжигдэж байгаа хэрэг биш зөвхөн ганцхан цонх л хаагдаж байгаа нь тэр. Хэзээ нэгэн цагт цонхны хаалт нээгдэх ч юм бил үү хэн мэдлээ. 

Харин би цонх хаагдсан бол хаалга заавал нээгдэнэ гэдэгт итгэдэг. Заримдаа хаалга аяндаа өмнө чинь нээгдэнэ, эсвэл хаалгыг эрж олох хэрэгтэй, үгүй бол тулаад ирсэн хаалгыг нээх түлхүүрийг олох хэрэгтэй...

Юу ч тохиолдсон сэтгэлээр нэг мөсөн үхэж болохгүй. Хэдэн өдөр уйлж болно. Дуугаа хураан дүнсийж болно. Архи ууж агсан тавьж болно. Дотроо шаналан зовж болно. Харин удалгүй босоод дахин эрч хүчтэйгээр амьдралын бас нэгэн хаалгыг онгойлгох зоригтой байх ёстой. Гунигаа нэг мөсөн гээж дотоод сэтгэлээ цэвэрлэдэг сэтгэлийн тэнхээтэй байгаарай. 

Имейл буюу цахим шуудангийн үе

Сүүлийн хэд хоног зочид гийчид ихтэй байсаар цаг заваар бага байлаа. Анзаараад, бодоод байсан чинь би бол имэйл буюу "цахим шуудангийн үеийн" хүн бололтой. Хайрын захиа, төрсөн өдрийн мэндчилгээ, санасан, хүссэн сэтгэл, уучлалт гуйсан гээд энэ бүхнээ цахилгаан мэндчилгээгээр илгээдэг байжээ. Одоо ч нөхөр бид хоёр хоорондоо цахилгаан шуудангаар харилцах нь элбэг.

Харин миний дараагийн залуу үе скайп, дуут шуудан, нүүрНом гээд орчин үеийн нийгмийн хэрэгсэл илүү ашигладаг бололтой. Магадгүй ухаант утсанд миний мэдэхгүй төрөл бүрийн аппликейшн байдаг биз ээ. 

Дээх нь үед цаасан дээр бичсэн захиагаар хайр дурлал, хагацал, үерхэл гээд бүхнээ илэрхийлдэг байсан санагдана. "Дурсгалын дэвтэр" гээч өнгө будаг, шүлэг дуу хосолсон уншихад таатай дэвтэр байдагсан. Надад ч тийм дэвтэр бага ангийн найзуудтайгаа хуваалцаж байсан санаанд орлоо.

Утсанд ирэх дуут мессеж, текст нэг л өдөр утсаа хаяхад хамт үгүй болно. Эсвэл ухаант утас гацаж эхлэхэд дурсамжийг нь устгахаас өөр аргагүйд хүрдэг. Өнөөх сайхан үгс, зураг замхран алга болох аж. Заримдаа дүрсээ харж яриагүй л бол хэн ч хэний өмнөөс юу ч гэж бичиж болох юм шиг айдас бас төрдгөө нуух юун. 

Олон жилийн өмнө Банжиг сайтад хэн эзэмшдэг нь мэдэгдэхгүй блогтой байлаа. Цөөхөн бичлэгтэй ч олон уншигчтай байсан санагдана. Нэг л өдөр хаагдчихсан байсан. Бичлэгээ өөртөө хадгалж авалгүй шууд нийтэлсэн тул надад үлдсэн  хувь байхгүй.

Техник, технологийг бүрэн сайн эмэмшээгүй над мэтийн хүмүүс давхар сайн юмаа хадгалж байх хэрэгтэй. Би сайхан үг, гоё зураг утсанд минь ирвэл арай найдвартайгаар нь имейл буюу цахим шуудандаа хуулчихдаг. Орчин үеийн вайбар, нүүрНомд итгэснээс өөрийн үеийн цахим шуудандаа итгэсэн нь дээр санагддаг.

Гараар цаасан дээр бичсэн захиа авах хамгийн нандин бөгөөд итгэлтэй. 

Онгоцны буудал

Үдсэн ч, угтсан ч өөрөө явсан ч хамаагүй онгоцны буудалд хэзээний дуртай би. Онгоцны үйлчлэгч болохыг хүүхэд насандаа ихээр мөрөөддөг байж билээ. Энэ мөрөөдлөө бага насны шохоорхол болсон нэгэн хүүд хэлтэл "чам шиг хөдөөний бор охин онгоцны үйлчлэгч болдоггүй юм" гэж хэлж байсан одоо ч санаанд тодхон. Одоо түүнтэй таарвал би мөрөөдөлдөө хүрсэн гэж хэлэх юмсан гэх эгдүүтэй бодол онгоцны буудал орох үед төрнө. 

Би өнөөдөр онгоцны үйлчлэгч биш ч Катай Пасифик компанийн олон улсын онгоцны үйлчлэгчийн ажилд хэзээ хойно 30 хүрэхийн босгон дээр тэнцэж, 725 өрсөлдөгчөөс эхний гуравт жагссан нь үнээн. Яадгийн, үнэн юмыг онгирчихъё оо. Ажилд урьсан гэрчлэх захиа нь ч байна. 

Ямар ажил хийж, юу өмсөхийг минь хэзээ ч зааж үзээгүй манай нөхөр тэр удаа хүчтэйхэн хориг анх удаа тавьснаар би мөрөөдлийн ажилдаа орохгүй байх сонголт хийсэн юм. Гэхдээ би өөрийгөө нэгэн мөрөөдөлдөө хүрсэнд тооцдог ба хийсэн сонголтондоо ч баяртай.

Хожим нөхрийн найзаас сонсохнээ намайг хэрэв онгоцны үйлчлэгч болвол зөндөө их санаад тэсэж сууж чадахгүй гэдгээ хэлсэн байдаг.

Харин миний онгоцны буудал орох бүр догдолдог сэтгэл хэв хэвээрээ. Санасан хүмүүсийг учруулж, хайртай хүмүүсийг салгадаг зааг. 

Үнэн сэтгэлийг хөөрсөн онгоц салгаж чадахгүй. Явсан хүн буцаад буугаад ирдэг нь сайхан. 

Хүнийг угтахаас илүү үдэх зовлонтой. Онгоц сэлгэх нэгэн агшинд угтаад үдэх бүр хэцүү байх даа. Заримдаа хэцүү зүйл тэр чинээгээрээ "амттай" бас хэзээ ч марташгүй үүрдийн дурсгал болон үлддэг ч байж мэднэ ээ. 

Онгоцны буудал дээр хэн нэгнээ олохгүй төөрсөөр онгоц нисэх цаг болвол харин харамсалтайяа. 

Үхтэл үр ба үрийн үр харам

Үр хүүхдээрээ хүн хийгээд амсхийж болдоггүй хорвоо бололтой. Үр нь том болсон ч үрийн үрийг өсгөх ажил үргэлжилнэ. Өөрөө ядарснаа нууж үрийнхээ төлөө зүтгэнэ. Эх хүний сэтгэлийг юутай ч зүйрлэж чадамгүй уужим. Хүний зарим ээжүүд ач, зээгээ өсгөхөөс төвөгшөөж байсныг сонссон удаатай. Харин миний муу хөгшин ээж "би өөрөө хүүхэдтэй ойр байх дуртай" хүн болон сайн дураараа ач зээгээ өсгөнө, асарна. Өөрөөс нь тусламж авахгүй бол хүүхэд шиг тунин гомдоно. 

Эрэмгий жанжин баатар Сүбээдэй далан насыг зооглоод босож суухад хэцүү өндөр нас иржээ гэсэн байхад жирийн нэг жижигхэн биетэй ээжийгээ үүрд залуу мэт сэтгэн үрийнхээ араас бөгтөлзүүлэх бид өчүүхэн сэтгэлтэй аминчхан хүмүүс мэт. 

Эмээдээ ойр өссөн хүүхэд илүү сайн хүн болдог ч юм шиг. Эргээд эмээгээ өргөх сайхан өдөр  хурдан ирээсэй ээжийн минь ач зээ нарт. Цаг хугацааг зогсоож байгаад ээждээ нас нэмэлгүй энхрий бяцхан үрийн үрсийг нь хурдхан том болгохсон...

Хайр л юм даа

Өврөөс минь чихэр горьддог үртэй хүн билээ би гэж дуу байдаг шиг хармайнаас минь амттан горьддог ханьтай хүн билээ би гэж нөхөр маань дуулмаар санагддаг байх даа. 

Манай хүн ажлаа тараад хаалгаар орж ирэнгүүт охин минь аав аа гэж муригнан гүйж энгэрт нь зүүгдэнэ. Би охинтойгоо уралдах шахам очиж надаа юу авчирсан гэж хармайг нь шалгана. 

Худалдаанд байдаггүй сонин содон амттай ус, жүүс, чамин жижиг савалгаатай, урьд өмнө үзэж хараагүй амттаныг орой бүр надад авчирна. Алдарт гүүгл ажилчдаа "эрхлүүлэх" бас нэгэн арга нь тэр бололтой. 

Надад цаг зав гаргасангүй, хангалттай хайрласангүй гэж намайг хошуу цорвойход нөхөр маань "би чамд орой бүр дэлгүүрт байхгүй чамин юм авчирч өгдөг биз дээ. Тэр чинь хайр" гэж хэллээ.

Угийн дуу цөөтэй, аливаа юманд туйлширч сүйд болдоггүй нөхөр маань нэг дуугарвал жинтэй үгтэй. Хүн амьтны хажууд чимээгүй дух үнэрлэж, нуруу илэхээс хэтэрч нялуурдаггүй нөхрийн маань хайраа илчлэх нэг хэлбэр ажээ. Би өөрийгөө түүний оронд тавьж зүйрлэхийг хичээв. Урт ажлын өдөр дуусч гэрийн зүг хөдлөхийн өмнө гэрт байгаа эхнэрээ санаж ямар амттан өнөөдөр аваачиж өгөх вэ гэж бодно, хайрлана, санана. Сэтгэлд нь ямар ч байсан уяатай л байж би. 

Заавал том хайрыг нэхэх биш жижиг хайрыг мэдэрч сурах бас хэрэгтэй юм уу ...

Өгөе гэвэл ганцаасаа гэдэг шиг

Манайхаас холгүй байх чамин байшинд амьдардаг эмээ жүрж, алим, нимбэгний модтой. Байсхийгээд л цэцэрлэгч ирж арчилж байгаа харагддаг. Эмээ үе үе илүү хураасан ургацаа жижигхэн цэвэрхэн цаасан хайрцагт хийж дээр нь "Үнэгүй. Өөртөө туслаад авна уу" гэсэн бичиг өлгөж хүний явдаг замын хажууд цэгцтэй тавина. 

Дэлгүүрийн органик шошготой жимс жимсгэнээс хамаагүй сайхан амттай. Ам ташсан хэрээ арван гурав дахина гэгчээр тэдний нимбэгийг би авах дуртай. Зүгээр нэг хайрцагт хийгээд орхих биш хажууд нь эвхээстэй цаасан уут орхих агаад хүмүүсийг тэр уутанд хийж авахыг бэлдсэн нь тэр. Нээрээ л зүгээр гудамжаар алхаж яваа хүн хэрэв тэр жимснүүдийг авч явахыг хүсвэл бэлэн хийх савгүй яах билээ. Үнэхээр хэн нэгэнд хэрэгтэй бол аваг гэсэн сэтгэлээр үлдээсэн нь энэ. 

Би аливаа зүйлийг хийхдээ, хэн нэгэнд тус болохдоо хөрш эмээ шиг чин сэтгэлээсээ хийдэг бил үү гэж бодонгоо өчигдөр зориуд санан байж жижигхэн цэцгийн баглааг "баярлалаа" ил захидлын хамт нимбэг байдаг хайрцагт үлдээв. Өнөөдөр эмээ намайг гаднаа нүүр дүүрэн мишээсээр амдан зогслоо. Би чамайг яг л өдийд охинтойгоо манай гадуур явж өнгөрдгийг мэднэ. Сайхан цэцэг, мэндчилгээ үлдээсэнд баярласнаа хэлэх гэсэн юм. Цэцгэнд дургүй эмэгтэй хүнийг би лав өдий наслахдаа үзээгүй. Өдрийг минь улам сайхан болгосонд баярлалаа. 

Чихэрлэг сэтгэлт охин минь (намайг Sweet heart гэж дуудсаныг ингэж хөрвүүлэв хэхэ) дараагийн Бямба гарагийн орой гэр бүлээрээ манайд ирж оройн хоол идээрэй гэх нь тэр. Нэрсээ ч мэдэхгүй бид хоёр хоорондоо хэзээний дотно хүмүүс мэт тэврэлдэн салав. 

Цэцэг надаас ирсэн гэдгийг яаж ч мэдсэн юм бүү мэд. Би ч баярласандаа сэтгэл хөөрөөд асуухаа ч мартсан байна. Сайхан сэтгэлт эмээгээс сурах юм мундахгүй гэдэгт найдна. 

Хэнээс шалтгаалах вэ?

Ямар нэгэн тус дэмгүй ч амьдралаас гаргаж болохгүй хүн байхад үнэхээр их тус болсон ч гаргахаас өөр замгүй хүн бас байх юм. 

 "Заримдаа амьдралд хүн тус болчоод гарах нь бүр их тус болдог" гэж нэгэн найз маань хэллээ. 

Тохиолдсон явдал, таарсан хүн, аялсан газар, учирсан хайр, бүтэлгүйтсэн дурлал гээд амьдралд тохиолдсон бүх зүйлийг жижиг сажиг гэлтгүй нягт нарийн бодоод байвал үнэхээр төрөл бүрийн киноны цуглуулга аж. Харин чи өөрөө киноны гол дүр. Заримдаа зохиолоо өөрөө бичиж болно ихэнхдээ "хувь тавилан" гэдэг найруулагч гарч ирээд зохиолыг чинь юу ч үгүй улаан балаар засаад хаячихна. 

Өөрөөсөө салгахыг хүсээгүй хүн найруулагчийн үгэнд ордог ч юм уу салаад явах нь бий. Гэтэл амьдралаасаа гаргахыг хүсээд, гуйгаад байхад хэзээ ч хаашаа ч явдаггүй хүн бас байна. Чиний тус дууссан одоо чи надаас яваад бүр илүү тус болоод өгөөч гээд гуйвал яадаг бол? Гуйх зориг дутах уу? Хүсэл төрөхгүй юу?

Заяаны хань зам дээр гэж манай монголчууд зүгээр ч нэг хэлээгүй биз. Ганц заяаны хань ч биш, учрах ёстой хүмүүс хожигдсон ч хамаагүй таардаг. Чухам тэр хүнийг амьдралдаа үүрд хадгалан үлдэх надаас шалтгаалах уу найруулагчаас шалтгаалах уу, аль эсвэл зөвхөн тухайн хүнээс үү? 

Тулга тойрсон хэдий ч

Улс төр, нийгэм, даяарчлал, хөгжил, цаг үе гээд бичвэл цар хүрээ томтой, эмзэг сэдэв зөндөө байна. Гэхдээ би энгийн хэрнээ хүн бүрийн дотоод сэтгэлд оршдог нандин мэдрэмжүүдийг тантай хуваалцаж, чадвал сэтгэлийн утсыг чинь хөглөе гэж бодсон юм. 

Сарны Сонат таны дотоод ертөнцөд чинь эгшиглэж, дурсамж, алдаа, бахархал, харамсал гээд бүхнээ дурсаж байвал болох нь тэр. 

Алдар хүнд олох гэсэнгүй, аливаа бүхнийг шүүмжлэхийг яарсангүй. Тулга тойрсон хэдий мэт санагдавч хүнээрээ л байх гэсэн их хүсэл минь нуугдаастай. 

Хүний орчлонгийн уран бөгөөд дээд мэдрэмж болох хайр, дурлал, эротик, үнсэлтийг орхин бичих хүсэл бас надад үгүй. 

Бичлэгийн өнгө аясыг минь ойлгон уншдаг та нартаа баярлалаа. Та наргүйгээр миний сэтгэлийн засал болсон бичлэгүүд минь утгагүй. 

Өглөөг хамт угтаж үзээгүй хүнийг амраг гэх үү?

Тэгнэ ээ, заавал нэг өдөр хамтдаа өглөөг угтаж кофе хамт ууна гэсээр нэг л мэдэхэд бүсгүй өөрийн замаа хөөн оджээ. 

Хамгийн залуу УИХ-ын гишүүн, хамгийн залуу сайд, хамгийн ухаантай, хамгийн царайлаг гээд түүнд хамгийн олон. 

Бүсгүйн хувьд ганцхан хамгийнтай. Түүнд тухайн үедээ хамгийн ихээр дурлаж явсан нь хамгийн үнэн. Гэр бүлтэйг нь мэдсээр байж тэмүүлсэн бие сэтгэлээ барьж дийлээгүй нь гал халуун залуу насны ганц том алдаа. 

Түүний хувьд бүсгүй байдаг л нэгэн түүнд дурласан "хөгжөөн дэмжигч". Магадгүй залууд кофе, тамхи нь бүсгүйгээс илүү хэрэгтэй. 

Хэд ах гэсэндээ ч тэр үү, эсвэл угийн халуухан, секси залуу болохоороо ч юм уу ор хөнжлийн ажилдаа гарамгай. Залуу бүсгүйд эдлээгүй жаргал, ханашгүй дурыг хангуулна.

Хүлээн байж, хөөцөлдөн байж ховорхон учирдаг болоод ч тэр үү залууд тэмүүлэн савлах охины зүрх хөөрхий. 

Сайхан залуугийн бие буудлын орон дээр бүсгүйн хажууд харин түүний сэтгэл, жинхэнэ хайр хэзээд гэртээ эхнэрийн өвөрт. Ухаарч ойлгоогүй залуу бүсгүйн буруу, ухааруулж өгөөгүй ах залуугийн алдаа. 

Залуу, охид дүү нар минь ийм алдаа гаргаж хэрхэвч болохгүй. Эхнэртэй хүнээс холуур яваарай. 

Өглөө бүрийг хамт угтаж чадахгүй хүнийг амраг гэж ойлгон охин хонгор насандаа харамсаж барахгүй алдаа битгий хийгээрэй. Хэзээ нэгэн цагт чи өөрөө хэн нэгний эхнэр болно гэдгээ санаарай. 

Эзнээ хайсан дурлалын захиа

Чи миний амьдралд гэрэл гэгээ цацруулан орж ирсэн. Бөхөж байсан галыг чи бадраасан. Ширгэж байсан голыг далай болгосон. Намайг эдгээж, сорвийг минь арилгасан. Аз жаргалыг минь бүтэн болгож, дахин амьдруулсан. 

Чи бол миний амьдралд учрах анхны бөгөөд сүүлийн цор ганц зориглол. 

Чамтай хамт бүтэн өдрийг өнгөрөөхсөн. Чиний ертөнцөөр зугаалж, чиний тухай мэдэхсэн. 

Чамайг налан сууж чиний дуртай киног үзэхсэн. Чиний гараас хөтлүүлж шөнөжин дэмий тэнэхсэн...

Чамтай зуун жилийг хамт өнгөрөөсөн ч би лав уйдахгүй. Чи бол зүрхэнд минь эгшиглэх мөнхийн дурлалын аяз. 

Намайг илүү секси болгогч Форд чамд би хайртай

Форд бид хоёрыг манай нөхөр анх 2009 оны намар танилцуулсан санагдана. Яг үнэндээ Фордыг харсан даруйдаа би түүнд ухаан алдатлаа дурлаж өөрийн болготлоо эндээс явахгүй гэж дотроо бодсоныг минь мэдсэн мэт манай хүн намайг Фордтой учруулж өгсөн билээ. 

Тэр өдрөөс хойш Форд бид хоёрын амраглал улам гүнзгийрч, би түүнд улам ч ихээр хайртай болж, салж хагацах минь өнгөрчээ. Хэрэгтэй үед олон долоон шалтаг тоочилгүй үргэлж надад тус болж бороотой, халууныг үл ойшоон надад үнэнчээр зүтгэнэ. Түүнгүйгээр би өнөөдөр хэрхэн ажлаа амжуулж, яаж шуухан амьдрах билээ дээ. 

Фордыг би жаахан хөгшрөөд ирэхээр залуу нэгнээр солих бодолтой байлаа. Харин одоо бол түүнийгээ нас дээр гарсан ч дэргэдээсээ холдууламгүйгээр их дасчээ. 

Нөхрийн эзгүйд Форд л надад хань болно. Түүнтэй хамт богино өмд эсвэл бошинз өмсөн явахдаа би бүр ч илүү секси болсон мэт сэтгэгдэл төрдөг. Над шиг хүнд томдсон гэж олон хүнээс сонссон ч том Фордод би дуртай. 

Тийм ээ, би Форд загварын машиндаа хайртай. 

Чамдаа хайртай

Үг хааяа зөрдөг ч зүрх нь үрчийдээгүй миний хань
Санал заримдаа нийлдэггүй ч сэтгэл нь хувирдаггүй ховор эрдэнэ
Үрдээ амьдралаас илүү хайртай, наддаа өөрөөсөө илүү хайртай
Сайн хүн, сайхан эрийн шинжийг багтаасан миний ганц амраг

Сэрчихлээ

Өнөөдөр гүн нойрноосоо сэрлээ
Өөрийн зохиосон зүүдээ төгсөглөө
Өрөөл бусдад зориулсан цагаа
Өөрийн хэддээ нөхөн зарцуулах минь

Нэг өдөр

Хэрэгтэй үед надад олдохгүй чамайг ор тас мартаад
Хэзээ ч юу ч болоогүй юм шиг хэнэггүйхэн алхая
Хажууд чинь хэн нэгэнтэй, магадгүй сайн найзтай чинь
Халуухан янагаар сэрлийг чинь хөдөлтөл үнсэлдэе нэг өдөр

Жаргалтайяа

Баруун талаас манай нөхөр гар, хөл, бүх юмаараа тэвэрч унтах гэж дайрна. Зүүн талаас охин минь өөрийнхөө орноос өнхрөн бөмбөрсөөр бөөрөнд наалдаж унтах гэнэ. Нөхрөөс эвтэйхэн мултарч охиноо хэсэг тэврээд ор өөд нь буцаан өнхрүүлмэгц одоо миний ээлж гэсэн шиг хань минь бушуухан намайг өөртөө татан тэвэрч аваад хошуугаа хүзүүнд наана. Энэ мэт байдал хэдэн цаг үргэлжилсээр миний нойр хулжиж орхисон тул нөхрөө сэм сэрээн босгож нөгөө унтлагын өрөөндөө орцгоов. 

Бид хоёр тэр чигтээ нам унтжээ. Өглөө охин минь өрөөний хаалга нүдэн сэрээж бид хоёрыг тэрүүхэндээ сандаргаад авлаа. 

Охин өсөж, аав ээж хоёр нь арга, тактикаа улам нарийсгах цаг иржээ. Хамгийн сайхан нь хоёр талаасаа тэврүүлэх хүнтэй би мөн жаргалтайяа. 

Зоригтой хэдий ч

Айхаа мэдэхгүй зоригтой хүмүүсийн нэгэнд би яах аргагүй багтана. Хэнбугайгаас ч айлгүй улаан үнэнийг зоригтой хэлж явснаараа хийхийг хүсэж байсан ажлаа алдаж байсан ч удаатай. Тухайн үед ээж маань надад хэтэрхий шударга хүн заримдаа алддаг гэж намайг сургангаа магтаж байсан удаатай. Хэн нэгний зориглож чадахгүйг хэнэг ч үгүй хийчихдэг аюултай этгээд.

Өвдөхөөс харин өөрийн эрхгүй айдаг. Өөрөө өвдөхөөс илүү "тэд" минь өвдчих вий гэхээс эмээдэг. Өвдөхийн зовлонг туулсан болохоор өрөөл бусдыг битгий өвдөөсэй гэж дотроо чимээгүй залбирдаг нэгэн би.

Эмч хүмүүсийг тэнгэрийн элч гэж битүүхэндээ шүтдэг. Чихрийн цуглуулга, дарс авдаг л гэж муулах юм манай монгол эмч нарыг. Өвдөөд эдгэсэн хүн сэтгэлээ илэрхийлэхийг өөрийн эрхгүй хүсдэг юм. Олон хоног, сараар өвдөж үзээгүй хүн өвчтэй нэгний зовлон болоод сэтгэлийг хэрхэн ойлгох вэ?

Америк, Солонгос, Хятад  гээд анагаахын дээд цолтон, сонсож үзээгүй шинэ техник хэрэгсэлээр оношлуулж, эмчлүүлж, хагалуулж, хатгуулж явлаа. Мэдлэгийн цар хүрээгээр Монгол эмч нар дутахгүйг мэдэрлээ. Орчин нөхцөл, үйлчилгээ ялгаатай ч хүнийг эдгээх чин сэтгэл, үзэж сурсан мэдлэг нь ялгаагүйг би үзлээ. 

Өөрийн биеэр судалж, туршиж үзээгүй хэрнээ дүгнэлт гарган монгол эмч нараа дорд үзэх явцуургүй мэт санагдана. 

Өвчингүй бол жаргал өргүй бол баян гэж түмэн үнэн ч өр тавиад ч хамаагүй зөвхөн эрүүл явахыг хүсэгчид бас байдаг юм аа. 

Хүн гэдэг сэтгэлийн амьтан юм уу даа

Хааяа нэг шөнө дөл болтол дүүтэйгээ буу халах сайхан. Бид хоёр нэг мужид ч гэлээ хүссэн үедээ уулзаад байж чадахааргүй хол амьдарна. Зулай зулайгаа гишгэлцэн төрөөгүй ч би дүү, дүү маань намайг эгч л гэнэ. Монголоор эгч, дүү гээд хэлэхэд хэн ч олон юм бодохгүй өнгөрнө. Харин энд нөгөөх хэл соёлын ялгаа гараад ирнэ дээ. Дүү буюу brother гэхээр төрсөн дүү гэж ойлгоно. Үндсэндээ эгчийн хүүхэд гэж зөвөөр хэлвэл nephew гэх ёстой. 

Миний хувьд nephew гэж хэлэх гэхээр бид хоёрын холбоо холдоод явчиж байгаа юм шиг сэтгэгдэл төрдөг болохоор дүү л гэж хэлэх дуртай. Дүү маань ч гэсэн намайг нагац эгч буюу aunt гэхээр бид хоёрын дотно холбоог илтгэж чадахгүй мэт. Эгч буюу sister гэвэл хүмүүст бид хоёрын харилцааг илүү зөвөөр ойлгогдох юм шиг санагдана. 

Дүү минь насаар бага ч заримдаа намайг пал хийтэл шударга үг хэлэх нь олонтаа. Өчигдөр орой унтахаас өмнө хамгийн сүүлд сонссон үг бол дүүгийн хэлсэн "хүн гэдэг сэтгэлийн амьтан" хэмээх дөрвөн үг. Энэ үгсийг бодсоор сэрлээ.

Нээрээ л эрэгтэй, эмэгтэй, хөгшин, залуу ялгаагүй бүгд сэтгэлийн амьтан юм уу даа. 

Сэтгэлийн зовиур хүнийг дотроос нь иднэ. Биеийн зовлонгоос илүү хүнийг стресст оруулдаг эд бол сэтгэлийн шаналгаа. Санаа амар бол бүх бие амар. Бүх бие амар бол амьдрал амгалан. 

Хажуу дахь хүндээ, ойр дотно, эргэн тойрныхондоо сэтгэлийн дарамт өгөлгүйгээр амьдрах юмсан бүгдээрээ. Өөрсдөө ч гэсэн аливаад санаа зоволгүй, байгаадаа сэтгэл хангалуун амьдарч, зөв сэтгэлээр өөдөө тэмүүлдэг байхсан. 

Дотоод сэтгэлээ нээдэг дүүтэй, эгчтэй, найзтай байх хэрэгтэй. Хэн нэгнийг эд мөнгөөр баярлуулахаас илүү сэтгэлийг нь инээлгэх үг хэлдэг, үйлдэл хийдэг байгаарай. 

Чин зүрхнээсээ хэн нэгний төлөө санаа тавьж, хэлсэн үг бүхэн сэтгэлийн гүнээс чинь ундран гардаг, хийсэн үйлдэл бүр чинь сайн санааных байвал тэр бүгд нөгөө хүндээ сайн сайхан энергийг тээн хүрэх болно оо.  Мэдээж тэр сайхан бүхэн өөрт чинь үржигдэн шингэх нь гарцаагүй ...

Сайн найз таардаг юм шүү, олдвол олигтойхон зуураад авдаг юм шүү

Найз нөхөд амьдралд орж гарч байдаг харин төрөл садан үүрд. Гэхдээ яс, цусны холбоогүй ч амьдралаасаа гаргаж боломгүй найз гэж бас байх юм. Олон сар жил дамжин нөхөрлөөгүй, гарын арван хуруунд багтахтай үгүйтэй нүүр тулан уулзсан хэрнээ хэзээний дотно найз мэт хүн надад бий.

Өдөр бүр уулзаж ярилцан сүйд болохгүй ч алсуур бие биендээ тусалж, хэн нэгнээ чин сэтгэлээсээ бодож явдаг найзууд. Цаг хугацаа алсран одох тусам бидний үерхэл чимээгүйхэн батжина. 

Найзад маань танихгүй, мэдэхгүй хүн гэж үгүй, бүтээхгүй, чадахгүй ажил ч гэж байхгүй. 

Гарын хуруунд өргөс орлоо гэх төдийд ч сугалж өгөх гээд нисээд ирж чадах сэтгэлтэй, чухал бөгөөд ховор бичиг цаас олох хэрэгтэй гэж дурьдаад өнгөрөх төдий олоод тавьчихдаг чадалтай нэгэн. 

Үргэлж хэн нэгэнд тусалж явдаг миний найзын санаа нь цагаан болохоор амьдрал сайн хань, хүү охин хоёроор шагнажээ. 

Хүнээрээ яваа найздаа эрүүл энх, амгалан сайхан амьдралыг хүсье. Энэ хоёр байхад аз жаргал аяндаа дагаад явдаг гэж би итгэдэг. 

Сэтгэл дотроо үг эвлүүлсээр зөндөө удлаа, их л урт хэлэх үгтэй шиг санагдсан ч цаасан дээр буусан нь ердөө энэхэн. Үлдсэнийг нь чи өөрөө надаар хэлүүлэлтгүй мэдэж байгаа үнэнч бөгөөд үүрдийн найз минь ээ. 

Уншигч өөрөө ч гэсэн хэн нэгний төрснөөс ялгаагүй найз биз ээ. Өөрт чинь ч бас амьдралаасаа гаргаж боломгүй эрхэм найз байгаа байлгүй. Удаан, цөөхөн хоногоор найзалсанаар битгий дүгнээрэй.

Сайхан хайр байдаг юм шүү, олдвол алдаж болохгүй хэмээн их найрагчийн хэлсэн шиг сайн найз таардаг юм шүү, олдвол олигтойхон зуураад авдаг юм шүү ... 

Санасан

Борооны дусал бүрийг тоолон санасан юмсан. Санаснаа хэлэхээр холдчих гээд, бодохгүй байхаар улам санах чамайг яалтай. Чихэнд эгшиглэх тэр аялгуу чамайг улам бүр сануулж, сэтгэлийг минь хөвсөлзүүлнэ. Яах гэж надад анх сонсгоо вэ? Яг л намайг ингэж жаргалтай зовоох гэж хүсээ юу? 

Харандааны чинь үзүүр болоод хамаагүй сараачаад хаях юмсан чиний зүрхийг өөрийн чинь гараар. Хэзээ ч арилахгүйгээр санасан гээд бичихсэн.

Эсвэл, усан борооноор хурд хэтрүүлэн давхиж очоод хаалгыг чинь тогшин сандрааж усанд орчихоод биеэ хатаалгүй өвөрт чинь орж чамайг норгон өөрийгөө хатаахсан. 

Энгэрт чинь тэврүүлэн эрхэлж нэг, хоёр, гурав ... хэдэн ч хамаагүй өдрүүдийг, шөнүүдийг санасан сэтгэлээ тайвширтал чамтай хамт өнгөрүүлмээр байна.  Үг дуугарч, үнсэхгүй ч байсан болно оо. Зүгээр л хамтдаа байхсан. 

Чамайг надаас холдуулсан бүгдийг шатаана. Чиний зурсан зураг, чиний утас, чиний уншсан ном, алив өөр юу байна гаргаад ир. Сэтгэлийг чинь нэгэнтээ чимсэн үгсээр шатаачихдаг ч юм бил үү чиний сэтгэлийг? Би чадахгүй. Гал шиг дүрэлзсэн сэтгэлтэй болохоос, цог шиг түлэх үг надад байхгүй. 

Хүйтэн, халуун ямар ч муухай үгээр нэгийгээ битгий гомдоож байгаарай. Үгийг эргүүлээд авч болдоггүй хүчтэй зэвсэг.